Fakultetit të Shkencave Sociale, në Universitetin Publik “ Kadri Zeka” në Gjilan organizoi diskutimin hapur me Kryetarin e Kuvendit të Maqedonisë së Veriut, Afrim Gashi.
Ngjarja me karakter akademik që u zhvillua në ambientet e universitetit ka bashkuar studentë, staf akademik dhe përfaqësues nga shoqëria civile.
Kryetari Gashi, fillimisht është pritur në takim nga Rektori i Universitetit, Prof. Asoc. Dr. Artan Dërmaku, me ç rast është bashkëbiseduar për rëndësinë e bashkëpunimit ndërinstitucional dhe rolin që luajnë universitetet në aspektin e edukimit dhe vetëdijesimit të qytetarëve të gjeneratave të reja.
Aktiviteti për këtë ngjarje pastaj ka vazhduarme ligjëratën e hapur para atyre që ishin të pranishmëm.
Nga Rektori Dërmaku, u shpreh mirënjohja për vizitën e një figure të rëndësishme politike në Universitetin Publik “Kadri Zeka” dhe kjo visitë është vlerësuar si mundësi për shkëmbim mendimesh dhe reflektim mbi zhvillimet politike në rajon.
“Për universitetin tonë është nder dhe kënaqësi të mirëpresim një personalitet të rëndësishëm politik si z. Afrim Gashi. Kjo vizitë u ofroi studentëve tanë një mundësi të drejtpërdrejtë për të dëgjuar dhe diskutuar mbi realitetin politik dhe shoqëror të shqiptarëve në Maqedoninë e Veriut, si dhe për të reflektuar mbi proceset integruese evropiane,” ka thënë Rektori Dërmaku.
Ndërkaq, në fjalën e tij, Afrim Gashi ka trajtuar një sërë çështjesh që prekin shqiptarët në Maqedoninë e Veriut, duke përfshirë rolin e tyre në funksionimin e shtetit, sfidat në zbatimin e Marrëveshjes së Ohrit, si dhe problematikat që lidhen me ligjin për përdorimin e gjuhëve.
“Megjithëse janë bërë përparime, veçanërisht pas vitit 2018, gjuha shqipe vazhdon të përballet me pengesa në zbatim, veçanërisht në fusha të tilla si uniformat e policisë dhe ushtrisë, legjislacioni dhe përdorimi në monedha, ku tre nene të ligjit aktual e kufizojnë përdorimin e saj”, theksoi Gashi.
Ai ka folur edhe për përpjekjet aktuale të koalicionit të katër partive shqiptare në Maqedoni për t’u unifikuar në një subjekt të vetëm politik, me qëllim forcimin e përfaqësimit dhe adresimin më efektiv të çështjeve të komunitetit shqiptar.
Së këndejmi ka theksuar nevojën për ruajtjen e identitetit kombëtar dhe traditës, por edhe për përqafimin e vlerave evropiane si pjesë e procesit të modernizimit dhe integrimit të vendit.
“Mos u shkëputni nga tradita; dijeni se nga vini. Mësoni historinë, por zhvillohuni në hap me kohën. Vlerat evropiane duhet t’i zbatojmë në praktikë para se të bëhemi zyrtarisht pjesë e Bashkimit Evropian. Le të mbjellim patriotizëm dhe atdhedashuri, të krijojmë mundësi për shkollim dhe jetë më të mirë në çdo dimension,” ishte porosia e tij drejtuar studentëve dhe të rinjve në përgjithësi.
Diskutimi u begatua edhe me pyetje, ide dhe mendime nga pjesëmarrësit, dëshmi kjo për interesimin e madh mbi temat politike dhe shoqërore, me fokus të veçantë mbi pozicionin, të drejtat dhe sfidat e shqiptarëve në Maqedoninë e Veriut./GJILANI INFO/
