Në Komunën e Vitisë është mbajtur debati publik për Kornizën Afatmesme Buxhetore (KAB) 2027–2029, dokument që përcakton orientimet financiare dhe prioritetet zhvillimore të komunës për tre vitet e ardhshme.
Takimi, i organizuar nga Komiteti për Politikë dhe Financa i Kuvendit Komunal, mblodhi përfaqësues të institucioneve, bizneseve, organizatave të shoqërisë civile dhe qytetarë, të cilët patën mundësi të japin vërejtje dhe propozime lidhur me planifikimin buxhetor.
Debatin e hapi kryesuesi i Kuvendit Komunal, Bekim Azizi, i cili theksoi se Korniza Afatmesme Buxhetore është një dokument kyç për përcaktimin e prioriteteve të zhvillimit lokal dhe për planifikimin e investimeve në interes të qytetarëve.
Më pas, drejtoresha për Buxhet dhe Financa, Milihate Ajeti, prezantoi përmbajtjen e KAB-së 2027–2029, duke shpjeguar planifikimet financiare, projektet prioritare dhe drejtimet strategjike të komunës për periudhën e ardhshme.
Gjatë debatit, zëvendëskryetari i Komunës, Hasan Aliu, shprehu keqardhje për pjesëmarrjen e ulët, sidomos të anëtarëve të Kuvendit Komunal dhe Komitetit për Politikë dhe Financa, të cilët ishin edhe organizatorë të këtij procesi. Ai theksoi se dokumente të tilla strategjike kërkojnë angazhim më të madh institucional dhe pjesëmarrje më aktive të qytetarëve, në mënyrë që nevojat dhe prioritetet e komunitetit të përfshihen në planifikimin buxhetor.
Në fund të debatit, pjesëmarrësit ngritën çështje dhe paraqitën propozime për projektet që duhet të përfshihen në planifikimet komunale gjatë viteve 2027–2029, me fokus në investimet që ndikojnë drejtpërdrejt në përmirësimin e jetës së qytetarëve të Komunës së Vitisë./Gjilani INFO/
