Teatri i Gjilanit ka shprehur pikëllimin e thellë për ndarjen nga jeta të gazetarit, publicistit dhe njeriut të kulturës, Nexhmedin Ymeri, duke e cilësuar largimin e tij si një humbje të madhe për jetën kulturore të Gjilanit.
Në reagimin e teatrit thuhet se Nexhmedin Ymeri ishte për shumë vite pjesë e Teatrit të Gjilanit, ku punoi me përkushtim deri në pensionim, duke dhënë një kontribut të çmuar në zhvillimin artistik dhe institucional të këtij institucioni.
Sipas Teatrit të Gjilanit, ai u dallua për profesionalizmin, urtësinë dhe dashurinë ndaj kulturës, duke fituar respektin e kolegëve, artistëve dhe të gjithë komunitetit.
“Largimi i tij është një humbje jo vetëm për familjen dhe miqtë, por edhe për gjithë jetën kulturore të qytetit”, thuhet në telegramin e ngushëllimit.
Në emër të kolektivit, Teatri i Gjilanit u ka shprehur ngushëllimet më të sinqerta familjes Ymeri, të afërmve, miqve dhe të gjithë atyre që e njohën dhe e vlerësuan Nexhmedin Ymerin.
Qoftë i përhershëm kujtimi për Nexhmedin Ymerin./Gjilani INFO/
