Qendra Kryesore e Mjekësisë Familjare në Viti, në koordinim me QRSHP-në në Gjilan dhe DKA-në në Viti, ka shënuar me aktivitete të ndryshme Javën Botërore të Imunizimit, e cila shënohet çdo vit me qëllim të rritjes së ndërgjegjësimit për rëndësinë e vaksinimit dhe imunizimit, me moton “Vaksinat mbrojnë në çdo moshë”.
Gjatë këtyre aktiviteteve është mbajtur ligjëratë me stafin shëndetësor për rëndësinë e vaksinimit dhe imunizimit nga dr. Faruk Sejdiu.
Kurse, në koordinim me QRSHP-në në Gjilan dhe DKA-në në Viti, si dhe me menaxherët e shkollave, dr. Delvina Lamallari ka mbajtur ligjëratë edukativo-shëndetësore për nxënësit e shkollës fillore në Gërmovë, ndërsa infermierja Lindita Leskovica ka mbajtur ligjërata në shkollat fillore në Tërpezë, Sllatinë e Epërme, Vërban dhe Ramjan, me qëllim rritjen e ndërgjegjësimit për rëndësinë e imunizimit, duke theksuar veçanërisht rëndësinë e vaksinës kundër HPV-së për parandalimin e infeksioneve dhe kancereve të shkaktuara nga ky virus te të dy gjinitë.
Në të njëjtën kohë është realizuar edhe vaksinimi i nxënësve të klasave të VI-ta sipas kalendarit të rregullt.
Këto aktivitete janë përcjellë edhe nga drejtoresha e Arsimit, Arta Ajeti, dhe drejtoresha e QKMF-së në Viti, dr. Vjollca Kadolli-Halili, e cila theksoi se të gjitha këto aktivitete mbahen me qëllim të vetëdijesimit të qytetarëve dhe nxënësve për rëndësinë e parandalimit të sëmundjeve të ndryshme, duke ndikuar drejtpërdrejt në parandalim, që është edhe misioni i KPSH-së./Gjilani INFO/
