Në kuadër të vizitës zyrtare në Shtetet e Bashkuara të Amerikës, drejtori për Mbrojtje dhe Shpëtim në Komunën e Gjilanit, Enver Shabani, ka zhvilluar takime me përfaqësues të departamenteve dhe institucioneve të ndryshme të Sioux City.
Gjatë kësaj vizite, drejtori Shabani mori pjesë në vizita dhe takime të rëndësishme institucionale, ku u shkëmbyen përvoja dhe praktika të mira në fushën e mbrojtjes dhe shpëtimit, menaxhimit të emergjencave dhe sigurisë publike.
“Vizita shërbeu si mundësi për forcimin e bashkëpunimit ndërinstitucional dhe për krijimin e kontakteve të reja profesionale në funksion të avancimit të kapaciteteve të Drejtoratit për Mbrojtje dhe Shpëtim”, tha Enver Shabani.
Sipas tij ky bashkëpunim kontribuon në thellimin e miqësisë dhe partneritetit ndërmjet Komunës së Gjilanit dhe Sioux City, duke hapur mundësi të reja për shkëmbim përvojash dhe bashkëpunim afatgjatë në fusha me interes të përbashkët./Gjilani INFO/
