Me fillimin e sezonit të korrje-shirjeve, prodhuesit vendorë raportojnë rendimente të mira të grurit dhe misrit, por sfidat ekonomike vazhdojnë të rëndojnë mbi sektorin e bujqësisë. Rritja e çmimeve të plehrave artificiale, karburanteve dhe inputeve të tjera bujqësore po e shtrenjton prodhimin, ndërsa çmimet e ulëta të grurit në treg po ua zvogëlojnë fitimet fermerëve.
Fermeri Gani Dobratiqi nga Prishtina, i cili këtë vit ka kultivuar 20 hektarë grurë dhe 5 hektarë misër, ka thenë se rendimenti i grurit ka kaluar 5 mijë kilogramë për hektar, ndërsa edhe misri premton një prodhim të mirë nëse kushtet atmosferike mbeten të favorshme.
Megjithatë, sipas tij, shpenzimet e larta për plehra, naftë dhe inpute të tjera bujqësore e kanë bërë sezonin shumë më pak fitimprurës.
Edhe Federata Sindikale e Bujqve e cilëson këtë një nga vitet më të mira për prodhimin e grurit dhe misrit, duke theksuar se kushtet klimatike kanë ndikuar pozitivisht në zhvillimin e kulturave bujqësore dhe pritet të arrihen rendimente ndër më të lartat në vitet e fundit.
Por ekspertët e bujqësisë paralajmërojnë se, pavarësisht rezultateve të mira në ara, Kosova ende nuk prodhon mjaftueshëm për të përmbushur nevojat e tregut vendor. Sipas profesorit Imer Rusinovci, vendi vazhdon të mbetet i varur nga importi i drithërave, ndërsa importimi i kulturave që mund të prodhohen në Kosovë, si gruri dhe misri, nuk është i arsyeshëm.
Fermerët shprehin shqetësim edhe për çmimin e ulët të grurit në tregun vendas, duke vlerësuar se në shumë raste ai nuk arrin të mbulojë as kostot bazë të prodhimit. Për ta, mbështetja më e madhe institucionale dhe politika më efektive për mbrojtjen e prodhimit vendor mbeten të domosdoshme.
