Disa banorë të lagjes Dardania, kanë shprehur shqetësimet në Komunën e Gjilanit, për kalim të pronave të tyre në territorin e Komunës së Artanës.
Drejtori për Gjeodezi, Kadastër dhe Pronë Bekim Salihu, tha se së fundmi, Komuna e Gjilanit, ka pranuar shqetësime nga qytetarët lidhur me çështjen e kufirit të zonës kadastrale në lagjen Dardania (Gavran).
“Ky kufi është përcaktuar gjatë procesit të decentralizimit, të udhëhequr nga qeveritë e kaluara — një proces të cilin Lëvizja VETËVENDOSJE e ka kundërshtuar në mënyrë të vazhdueshme që nga fillimi”, tha Bekim Salihu.
Më tej ai theksoi se si pasojë e këtij procesi, përveç pjesës së lagjes Dardania (Gavran), Komuna e Gjilanit ka humbur në total një territor të konsiderueshëm me sipërfaqe prej 123 km².
Drejtori për Gjeodezi, Kadastër dhe Pronë, tregoi se konkretisht: Komunës së Novobërdës i janë kaluar nëntë zona kadastrale: Parallovë, Makresh i Epërm, Makresh i Ulët, Muzgovë, Dragancë, Strazhë, Kufcë e Epërme, Stanishor dhe Koretishtë, me një sipërfaqe të përgjithshme prej 94.42 km²;
Bekim Salihu tregoi se: Komunës së Parteshit, i janë kaluar tri zona kadastrale: Partesh, Budrigë e Poshtme dhe Pasjan, me një sipërfaqe prej 28.67 km².
“Komuna e Gjilanit, mbetet e përkushtuar në adresimin e këtyre shqetësimeve dhe në mbrojtjen e interesit publik, duke shqyrtuar të gjitha mundësitë ligjore për trajtimin e kësaj çështjeje në mënyrë transparente dhe me përgjegjësi të plotë institucionale”, tha Bekim Salihu, drejtor për Gjeodezi, Kadastër dhe Pronë./GJILANI INFO/
