Cristiano Ronaldo këmbëguli në merkaton e verës për t’u larguar nga Manchester United me destinacion tek një skuadër që luante në Champions League, kompeticionin e preferuar të CR7.
Megjithatë, për shumë arsye, sulmuesi mbeti në Old Trafford teksa e ka nisur sezonin me “Djajtë e Kuq” si rrallëherë; tashmë Ronaldo është shndërruar në një lojtar stol dhe trajneri Erik ten Hag preferon freskinë e lojtarëve të rinj në sulm para eksperiencës së 37-vjeçarit.
Në këtë formë, bindja e luzitanit për t’u larguar nga United nuk ka ndryshuar dhe duket se Ronaldo do të provojë sërish nëpërmjet agjentit Mendes të sajojë një akomodim të ri.
Ndoshta, këtë herë eksperienca e re e Ronaldos mund të mos jetë edhe aq e re pasi një opsion është rikthimi te klubi ku hodhi hapat e parë si profesionist, Sportingu i Lisbonës. Ndërsa, alternativë mbetet edhe Fenerbahçe, Napoli apo një destinacion jashtë Europës, si MLS në Amerikë.
