Rektori i Universitetit Publik “Kadri Zeka” në Gjilan, Prof. Asoc. Dr. Artan Dermaku, së bashku me një delegacion, mori pjesë në Konferencën e 20-të Vjetore Ndërkombëtare me temë “Zhvillimi në kohë të trazuara”, e cila u mbajt në Universitetin e Shkodrës “Luigj Gurakuqi”.
Ky edicion jubilar i konferencës, që këtë vit rikthehet në Shkodër pas një tradite 20-vjeçare ndërmjet Shqipërisë, Kosovës dhe Maqedonisë së Veriut, mblodhi studiues, pedagogë dhe përfaqësues institucionalë nga 26 vende të botës, duke krijuar një atmosferë të gjallë shkencore dhe bashkëpunuese.
Seanca plenare u drejtua nga Zv. Rektorja Blerta Dragusha, ndërsa Rektori i UNISHK, Prof. Dr. Tonin Gjuraj, theksoi në fjalën e tij rëndësinë e ruajtjes së rolit dhe mendimit njerëzor në kohën e teknologjisë së avancuar.
Në vijim, punimet e Konferencës i përshëndeti edhe Prof. Asoc. Dr. Artan Dermaku, Rektor i Universitetit Publik “Kadri Zeka”, Gjilan. Rektori Dermaku vlerësoi rolin e konferencës si një urë e fortë bashkëpunimi akademik ndërmjet universiteteve të rajonit dhe theksoi rëndësinë e shkëmbimeve shkencore për afirmimin e universiteteve publike kosovare në arenën ndërkombëtare.
I ftuar i nderit ishte Ambasadori i Republikës së Kosovës në Shqipëri, z. Skënder Durmishi, ndërsa përshëndetje mbajtën edhe përfaqësues të arsimit parauniversitar dhe universiteteve ndërkombëtare, përfshirë znj. Romina Gurashi nga Italia.
Në Konferencën e sivjetme të Shkodrës prezantuan 180 punime shkencore, 275 autorë e kontribues dhe pjesëmarrës nga katër kontinente. Paralelisht janë zhvilluar edhe Konferenca e 5-të e Shkollës së Drejtorëve të Arsimit Parauniversitar, Konferenca e 4-të e LTC dhe Botimeve “Polis”, si dhe Konferenca e 6-të e Forumit Sociologjik të Ballkanit.
Në mbyllje të seancës plenare, znj. Bresena Kopliku, Drejtore e Kërkimit Shkencor dhe Ndërkombëtarizimit në UNISHK, përgëzoi punën e të gjithë kontribuuesve në realizimin e këtij edicioni jubilar.
Pjesëmarrja e Universitetit Publik “Kadri Zeka” në këtë forum të rëndësishëm ndërkombëtar dëshmon përkushtimin e institucionit ndaj bashkëpunimit rajonal, ngritjes së cilësisë akademike dhe avancimit të kërkimit shkencor./Gjilani INFO/
