Kryetari i Komunës së Kamenicës, Kadri Rahimaj, ka bërë të ditur se së shpejti do të hapet një fabrikë e re në këtë komunë.
I pari i Kamenicës, i cili po qëndron për një vizitë zyrtare në shtetin e Zvicrës është takuar me bashkatdhetarin Samir Vllasi, i cili është bartës i këtij projekti.
Kryetari Rahimaj, njoftoi se ky projekt kap shifrën prej gjysmë milioni euro investim, dhe ofron mbi 10 vende të reja të punës qysh në fillim të operimit, si dhe sipas tij qëllimi primar i kësaj fabrike do të jetë prodhimi i mbështjellësve të aluminit për sistemet ventiluese, me qëllim eksportin në Evropë.
Ndër të tjera, Kryetari Rahimaj, i cili në këtë vizitë zyrtare po qëndron së bashku me Drejtoreshën e Zhvillimit Ekonomik, Burbuqe Leka, dhe shefin e kabinetit, Vaxhid Rexhepaj, kanë takuar Presidenten e Parlamentit të Kantonit të Gjenevës, Celine Zuber Roy, me ftesën e të cilës kanë ndjekur edhe një pjesë të punimeve të seancës.
Kryetari Rahimaj, u takua edhe me deputetët shqiptarë të kantonit të Gjenevës me prejardhje nga Anamorava, si Leonard Ferati, Xhevrije Osmani, Arber Jahija e Skënder Salihi, nga të cilët u njoftua për temat që i ngrisin dhe përpjekjet e tyre për përfaqësim dhe integrim të shqiptarëve.
I pari i komunës, njoftoi se gjatë kësaj vizite ka takuar edhe Mauro Poggia, i cili ka dy funksione, deputet në kantonin e Gjenevës dhe Anëtar i Parlamentit Kombëtar të Zvicrës, e të cilin e njoftoi për qytetin tonë dhe mundësitë që ofron Kamenica.
Kryetari Rahimaj, ka falënderuar Ambasadorin e Paqes Tahir Shabani, i cili mundësoi këto takime. /GJILANI INFO/
