Prokuroria Themelore në Gjilan, në kuadër të Strategjisë Kombëtare kundër trafikimit me njerëz në Kosovë 2022-2026, gjatë ditës së sotme ka mbajtur takim me akterët të cilët merren me rastet kundër trafikimit me njerëz.
Në këtë takim të organizuar nga Prokuroria Themelore në Gjilan, pjesëmarrësit u pritën nga Prokurorja koordinatore për veprat penale kundër trafikimit me njerëz, znj. Leonora Kadriu e cila i falënderoj pjesëmarrësit dhe bëri një elaborim të takimit lidhur me rastet dhe trajtimin e tyre nga ana e Prokurorisë Themelore në Gjilan.
Pjesëmarrës gjatë këtij takimi kanë qenë përfaqësues nga Policia e Kosovës, Zyra për Mbrojtje dhe Ndihmë Viktimave, Qendra për Punë Sociale, Qendra e Shëndetit Mendor, Drejtoria e Arsimit, Drejtoria për shëndetësi dhe mirëqenie sociale, Shërbimi Sprovues i Kosovës, OJQ ‘’Akti’’.
Gjatë takimit janë diskutuar çështjet e zbatimit të Strategjisë Kombëtare Kundër Trafikimit me Njerëz në Kosovë 2022-2026, bashkëpunimi dhe koordinimi në mes këtyre institucioneve, në ndërmarrjen e veprimeve dhe masave konkrete, me qëllim të identifikimit të sfidave dhe përmirësimit të gjendjes në parandalimin dhe luftimin efikas të trafikimit me njerëz, si dhe caktimit të një date konrekte për organizimin e ligjëratave, si fillim nëpër shkollat e Komunës së Gjilanit, e pastaj edhe komuna tjera.
Në fund të takimit të pranishmit caktuan datën 6 nëntor 2025 si ditë kur do të mbahet ligjërata vetëdijesuese dhe sensibilizuese me nxënësit e shkollave të mesme (klasat e dhjeta – 10) si dhe vlerësuan bashkëpunimin e deritanishëm dhe u dakorduan që të vazhdojnë, të realizojnë takime të rregullta koordinuese, si mekanizëm i përbashkët në arritjen e qëllimeve të përbashkëta në parandalimin e dukurive negative në shoqëri./GJILANI INFO/
