Sot shkolla jonë dhe mbarë komuniteti arsimor po përjetojnë humbje të madhe, ndahet nga jeta profesori ynë i dashur dhe i nderuar, Nexhat H. Rexha.
Me mbi 40 vite përvojë të pandërprerë në arsim, profesori Rexha ishte më shumë se një mësimdhënës: ai ishte një kontribues i madh në edukimin e gjeneratave, një njeri që e jetoi profesionin me pasion, përgjegjësi dhe dashuri të thellë për nxënësit dhe të gjithë ne që e njohëm.
Në secilin vit, në secilën klasë dhe në secilin nxënës, ai la një gjurmë të veçantë. Me urtësinë, me përkushtimin dhe me shembullin e tij të pashoq, profesor Nexhati u bë udhërrëfyes për dijen, model i edukatës dhe frymëzim për kolegët dhe nxënësit e shumtë që patën fatin ta njihnin.
Humbja e tij është e madhe, jo vetëm për familjen dhe shkollën, por për tërë arsimin, sepse bashkë me të mbyllet një kapitull i pasur i punës dhe i kontributit të pandalshëm për brezat.
Në këto çaste dhimbjeje, shkolla jonë shpreh ngushëllimet më të sinqerta për familjen, të afërmit dhe të gjithë ata që e njohën dhe e vlerësuan. Kujtimi për profesor Nexhat Rexhën do të mbetet i gjallë në zemrat tona dhe në historinë e arsimit tonë, behet e ditur nga faqja zyrtare- Gjimnazi ” Zenel Hajdini”./GJILANI INFO/
