Në Teatrin e Qytetit të Gjilani, mbrëmë u dha premiera e shfaqjes “Kabare 1999”, bashkëprodhim i Teatrit të Qytetit Gjilan dhe Artpolis – Qendra për Art dhe Komunitet, e cila u mirëprit jashtëzakonisht mirë nga artdashësit e pranishëm, që ishin në numër, ndërkohë që një pjesë e tyre edhe u kthye mbrapsht, për shkak se interesimi ishte më i madh sesa hapësira në skenë, ku ishte e zhvendosur shfaqja.
Gjithsesi, sot dhe nesër është paraparë repriza e kësaj shfaqje dhe të gjithë të interesuarit mund ta ndjekin atë në fillim prej orës 20:00, ndonëse sipas drejtuesve të Teatrit edhe për sonte biletat tani më janë shitur, ndërsa për reprizën e nesërme ka edhe pak vende.
Përndryshe, kur jemi te shfaqja “Kabare 1999”, me regji e dramatizim nga Zana Hoxha, ishte kjo një shfaqje teatrore muzikore e vendosur në Kosovën e pasluftës, që ndërthur këngën, humorin e zi, ironinë dhe kujtesën kolektive.
Ishte një shfaqje që përmes formës së kabaresë vendos fokusin në Prishtinën e pasluftës, duke ndërtuar një hapësirë skenike ku ironia, muzika dhe fjala bashkëjetojnë si mjete të leximit të realitetit shoqëror.
Në qendër të shfaqjes është Aida, një vajzë që vjen në Prishtinë për të ndjekur karrierën dhe për të ndërtuar një jetë të re. Ditën shkruan, ndërsa natën punon si bariste në “Klub Europa”, një kabare improvizuese ku realiteti dhe performanca përzihen, duke e futur në një trekëndësh dashurie dhe në kërkim të identitetit të saj…
“Kabare 1999”
Sipas: Joe Masteroff
Dramatizimi dhe Regjia: Zana Hoxha
Aktorë: Kushtrim Qerimi, Semira Latifi, Edon Shileku, Aurita Agushi, Ali Demi, Safete Mustafa Baftiu, Gëzim Bucolli, Gani Rrahmani, Mejreme Berisha, Blend Arifi
Muzika origjinale dhe këngët: John Kander, Fred Ebb
Orkestrues: Liburn Jupolli
Muzikantët: Roland Masurica, Premtim Selimi, Ndriqim Bajrami
Kërcimtare: Aulonë Nuhiu, Jeta Musolli
Drejtor artistik: Erson Zymberi
Skenograf: Bekim Korça
Koreograf: Sead Vuniqi
Kostumografe: Yllka Brada
Dizajni i ndriçimit: Burim Baftiu
Asistente e kostumografisë: Qendresa Isufi
Asistent regjie: Flamur Ahmeti
Organizator: Dhurim Ismaili – Dajki
Përkthimi: Erzë Uka
Tonist: Alban Limoni
Rrobaqepëse: Kledia Kurtalani
Teknikë skene: Mejdi Hoti, Fehmi Hoti, Haki Aliu, Selami Hoti
Rekuiziteret: Suad Berisha, Artan Limoni
Teknik ndriçmi: Xhabir Bilalli
Grimi: Minka Fejzullahu
Përndryshe, Gjilani edhe njëherë po e dëshmon se ka artdashës për të cilët duhet të ofrohen shfaqje të mira. /Gjilani INFO/
