Drejtoria Rajonale e Policisë në Gjilan, në kuadër të angazhimeve të vazhdueshme për forcimin e bashkëpunimit dhe ndërtimin e besimit me komunitetin, sot më datën 24.12.2025 ka filluar me realizimin e një sërë aktivitetesh në kuadër të projektit “Fëmijë të festojmë së bashku 2026”.
Këto aktivitete zhvillohen në bashkëpunim me Sindikatën Rajonale të Policisë në Gjilan si dhe Këshillin Lokal për Siguri Publike (KLSP) “Abdullah Presheva” në Gjilan.
Dhurata do të shpërndahen për fëmijë të takuar në pika të kontrollit të automjeteve gjatë ndaljes së mjeteve, për fëmijë në strehimore, në repartin e pediatrisë në qytetin e Gjilanit, për fëmijë me nevoja të veçanta përfshirë ata nga organizata HANDIKOS, për fëmijë të komuniteteve të ndryshme si dhe për fëmijë me Down Syndrome.
Policia e Kosovës është këtu jo vetëm për të mbrojtur, por edhe për të ndarë momente të veçanta si këto me komunitetin me raste festive, duke dëshmuar se bashkëpunimi ndërmjet Policisë dhe qytetarëve mbetet një shtyllë e rëndësishme për ndërtimin e një shoqërie më të mirë./Gjilani INFO/
