Në një ceremoni përshëndetëse mes kolegëve e familjarëve pas 11 vitesh punë në Drejtorinë Komunale të Arsimit, sot është pensionuar zyrtari Xhemajl Berisha.
Drejtori i Arsimit, Afrim Dervishi, në fjalën e tij theksoi vyrtytet që kishte zyrtari Berisha.
“Sot po e përshëndesim Profen Xhem i cili ka pasur disa veti të veçanta që vështirë i gjejmë tek njerëzit e tjerë. Gatishmëria e tij ka qenë e madhe për të ndërtuar raporte miqsore e kolegiale me të gjithë pavaresisht rrethanave, që kanë të bëjnë me moshen, profesionin e keshtu me radhë”, ka thënë Drejtori Dervishi duke shtuar se pë të qenë i suksesshëm duhet të kesh shumë shokë e miqë, që të këshillojnë por edhe të japin vërejtje aty ku gabon, e që sipas tij i tillë ishte profesori Xhemajl.
“Përvoja e tij si drejtor i ndërmarrjes shoqërore atëkohë, e pastaj në DKA ka qenë një vlerë e shtuar, e për mua shpresë për të ecur përpara e mundësi për t’ia qëlluar saktë çdo gjëje. Andaj në emër të kryetarit ia urojmë pensionimin, duke i dëshiruar shëndet, e ta gëzoj me njerëz të mirë e familje”, ka shtuar ai.
Edhe zyrtari Xhemajl Berisha në fjalën e tij përshëndetëse ka falënderuar të gjithë për bashkëpunimin që ka pasur deri më tani.
“Ju jam mirënjohës për kohën që keni gjetur ta ndani në momentin më të rëndësishëm të punës sime. Kam pasur fat të punoj në të gjitha sistemet dhe kam bërë përvojë të mjaftueshme. Ju falenderoj juve edhe kryetarin Kadri Rahimaj e Drejtorin e Arsimit, e poashtu shefin e kabinetit Vaxhidin, dhe të gjithë për mbështetjen e dhënë. Kemi qenë miqë e shokë, por ndonjëherë ka ndodhur që kemi pasur ndoshta ndonjë keqkuptim, mirëpo edhe ato janë momente të punës së përditshme. Andaj faleminderit shumë”, ka thënë ai.
E në këtë ceremoni edhe profesori Adhurim Maka në shenjë falenderimi për kontributin e dhënë të zyrtarit Xhemajl Berisha sa ishte profesor, i dhuroi një dhuratë modeste./GJILANI INFO/
