Në kazermën e Forcës së Sigurisë së Kosovës (FSK), në Gjilan u organizua ceremonia solemne ushtarake për daljen në pension të Rreshter Afrim Nuhiut.
Në mesin e shumë të pranishmëve ishte edhe ish-komandanti i Ushtrisë Çlirimtare të Kosovës (UÇK), në Zonën Operative të Karadakut (ZOK), Ahmet Isufi, i cili e ka vlerësuar lartë Nuhiun për shërbimin e tij për lirinë e Kosovës dhe për angazhimin e tij me nder e krenari edhe në paqe, në kultivimin e lirisë.
“Me nder e krenari e në mënyrë solemne, iu organizua ceremonia madhështore ushtarake, me rastin e daljes në pension, Rreshter, Afrim Nuhiut- Unitetit. S’kishte si të ishte ndryshe, kur gjeneza e tij buron nga Seferajt, i rritur me tregimet e betejave të kreshnikut të Karadakut, Idrizit me bashkëluftëtarë”, ka thënë Isufi.
Ai ka thene se tradita vazhdoi që në fëmijëri, me protesta e demonstrata, për të synuar kryengritjen e armatosur në radhët e Ushtrisë Çlirimtare të Kosovës sa në Karadak e Llap pa u ndalur asnjë çast.
“I brymosur me idealin e luftës kundër robërisë, Uniteti i përgatitur profesionalisht, kuptoi edhe rëndësinë e ruajtjes dhe kultivimit të vlerës së lirisë duke iu përgjigjur transformimit dhe aftësimit ushtarak nga Trupat Mbrojtëse të Kosovës në Forcën e Sigurisë së Kosovës”, ka theksuar, Ahmet Isufi.
Ai tha se Afrim Nuhiu doli në pension si një akt zyrtar, por ai nuk ndalet në angazhime tutje dhe përvoja e shembulli i tij vazhdon te kolegët e uniformës që çdo ditë do ta bëjnë krenar me arritjet dhe sukseset e FSK-së.
“Shëndet e gjitha t’mirat Afrimit dhe familjes së tij. Urime!”, tha ai. /GJILANI INFO/
