Kryetari i Komunës së Vitisë, Sokol Haliti, i shoqëruar nga drejtoresha e Arsimit, Arta Ajeti dhe bashkëpunëtorë të tjerë, kanë pritur sot në takim dy mësimdhënësit, Emrush Zuka dhe Ramiz Limani që janë pensionuar.
Gjatë këtij takimi, u vlerësua lart kontributi i çmuar që dy mësimdhënësit kanë dhënë ndër vite për arsimin në këtë komunë. Kryetari Haliti i falënderoi ata për përkushtimin shumëvjeçar, duke i cilësuar si mësimdhënës të jashtëzakonshëm që kanë ndikuar drejtpërdrejt në formimin e shumë gjeneratave.
“Ju uroj një pensionim të mbarë e të rehatshëm, duke ju inkurajuar që të vazhdoni të jeni aktivë dhe të jepni kontributin tuaj në interes të komunitetit,” u shpreh ndër tjerash kryetari Haliti.
Gjithashtu, fjalë mirënjohjeje për punën dhe përkushtimin e tyre pati edhe drejtoresha e Arsimit, Arta Ajeti, e cila vlerësoi rolin e tyre kyç në zhvillimin e procesit edukativo-arsimor në komunën e Vitisë.
Në shenjë respekti dhe mirënjohjeje, kryetari Haliti u ndau atyre nga një mirënjohje.
Përndryshe Emrush Zuka u pensionua pas 42 viteve kontribut në fushën e arsimit, kryesisht në shkollën e Pozheranit.
Kurse Ramiz Limani u pensionua pas 25 viteve përvojë pune në shkollat e fshatrave Stubëll dhe Letnicë./Gjilani INFO/
