Fëmijët e strehuar në Strehimoren “Liria” tashmë kanë një hapësirë të re ku mund të luajnë, të argëtohen dhe të ndihen më të sigurt.
Në këtë strehimore është inauguruar këndi i ri i lodrave, projekt i realizuar me mbështetjen e Zyrës Turke në Kosovë, me qëllim krijimin e një ambienti të përshtatshëm për lojë, zhvillim dhe rehabilitim emocional të fëmijëve.
Drejtoresha e Drejtorisë së Shëndetësisë dhe Mirëqenies Sociale të Komunës së Gjilanit, Mimoza Kadriu Qerimi, tha se ky kënd do t’u mundësojë fëmijëve të kenë një hapësirë të sigurt, ku mund të argëtohen, të socializohen dhe të ndihen të mbrojtur.
“Shprehim mirënjohjen dhe falënderimin tonë për Zyrën Turke në Kosovë për kontributin e çmuar, si dhe për stafin e Strehimores ‘Liria’ për përkushtimin dhe punën e palodhshme në ofrimin e kujdesit dhe mbështetjes për gratë dhe fëmijët”, ka deklaruar Kadriu Qerimi.
Sipas saj, investimet në mirëqenien e fëmijëve janë investime në një të ardhme më të sigurt dhe më të mirë.
Këndi i ri synon t’u krijojë fëmijëve të strehuar mundësi për lojë dhe zhvillim në një ambient më të përshtatshëm, duke e bërë qëndrimin e tyre në strehimore sa më të sigurt dhe dinjitoz./Gjilani INFO/
