Në kuadër të fushatës për zgjedhjet lokale të 12 tetor, Nisma Socialdemokrate shpalosi programin e saj para qytetarëve gjilanas, e i pranishëm në këtë takim ishte edhe kreu i këtij subjekti politik, Fatmir Limaj.
Ai tha se sot, së bashku me kryetarin e degës dhe bartësin e listës së Nisma Socialdemokrate, Ismet Hajdini, prezantuam programin e NIsma-s, për Gjilanin.
Limaj tha se Ismet Hajdini, me përvojën e tij të gjatë institucionale dhe angazhimin qytetar, po udhëheq një ekip të vendosur për një ndryshim të vërtetë.
“Gjilani ka humbur shumë kohë, pavarësisht se ka pasur njerëz, fuqi dhe gjithçka tjetër për të arritur një transformim të madh, prandaj, fokusi i ekipit tonë për Kuvendin Komunal janë nevojat reale të qytetarëve, transporti publik, furnizimi i sigurt me ujë të pijshëm, zgjidhja për ujërat e zeza këto janë vetëm disa nga prioritetet tona që, me punë dhe angazhim, së bashku me qytetarët, do t’i kthejmë në realitet”, ka thënë Limaj.
Përndryshe, Nisma Socialdemokrate në Gjilan garon për Asamble Komunale me listën prej 20 kandidatësh, për të cilët, bartësi i listës, Ismet Hajdini ka thënë se është një ekip i mirë, i veprave dhe jo i fjalëve boshe, andaj po gjejnë kudo mbështetje qytetare.
Ai tha se nuk ka dyshim se Nisma do të jetë pjesë e Kuvendit dhe se anëtarët e saj do të angazhohen që interesi dhe kërkesat qytetare të gjejnë trajtim dhe realizim nga institucionet e komunës.
