Komuna e Kamenicës ka mbajtur punëtorinë e parë në kuadër të procesit për hartimin e Planit të Mobilitetit të Qëndrueshëm Urban (PMQU), një dokument strategjik që synon avancimin e transportit dhe lëvizshmërisë në komunë.
Aktiviteti u organizua në bashkëpunim me UN-Habitat Kosova dhe me mbështetjen e Friedrich Ebert Stiftung (FES), duke mbledhur përfaqësues institucionalë, ekspertë të fushës dhe akterë të ndryshëm lokalë.
Punëtorinë e hapi kryesuesi i Komisionit për hartimin e PMQU-së, Besim Morina, i cili prezantoi qëllimet dhe rëndësinë e këtij procesi për zhvillimin urban të Kamenicës. Në takim morën pjesë përfaqësues të Ministrisë së Mjedisit, Planifikimit Hapësinor dhe Infrastrukturës, zyrtarë komunalë, përfaqësues të Policisë së Kosovës, si dhe organizata partnere.
Gjatë punimeve u prezantuan të dhënat fillestare mbi gjendjen e transportit dhe lëvizshmërisë në komunë, ndërsa përfaqësuesit e Komunës së Vushtrrisë ndanë përvojat e tyre nga procesi i hartimit të planeve të ngjashme.
Pjesëmarrësit diskutuan sfidat aktuale që lidhen me qarkullimin, sigurinë rrugore dhe qasjen në transport, duke identifikuar nevojat dhe prioritetet që duhet të përfshihen në dokumentin final.
Sipas Komunës së Kamenicës, plani do të krijojë bazën për një sistem transporti më funksional, më të sigurt dhe më miqësor ndaj mjedisit, duke kontribuar në përmirësimin e kushteve të jetesës për të gjithë qytetarët./Gjilani INFO/
