Në Universitetin Publik “Kadri Zeka” u mbajt sesioni informues në kuadër të projektit “Empowering Inclusion in Higher Education (EIHE)”, projekt i cili zbatohet nga HANDIKOS-Prishtinë dhe mbështetet nga Programi SHER. Në këtë sesion morën pjesë studentë, staf akademik dhe administrativ të universitetit.
Në hapje të aktivitetit, pjesëmarrësit u përshëndetën nga Prorektori për Buxhet dhe Financa, Naim Mustafa, i cili theksoi rëndësinë që UKZ i kushton përfshirjes së studentëve me aftësi të kufizuara dhe krijimit të një mjedisi akademik të qasshëm për të gjithë. Ai theksoi se UKZ mbështet dhe inkurajon iniciativat që promovojnë barazinë dhe praktikat gjithëpërfshirëse në arsimin e lartë.
Fjalë përshëndetëse mbajti edhe përfaqësuesja e Programit SHER, e cili vuri në pah rëndësinë e bashkëpunimit me institucionet e arsimit të lartë dhe rolin që ky program ka në avancimin e politikave gjithëpërfshirëse në Kosovë. Ajo përgëzoi UKZ-në për gatishmërinë dhe angazhimin e vazhdueshëm në projekte që synojnë fuqizimin e studentëve me aftësi të kufizuara.
Gjatë sesionit, përfaqësuesja e organizatës HANDIKOS prezantoi aktivitetet, objektivat dhe mundësitë që ofron projekti EIHE, i cili synon forcimin e praktikave gjithëpërfshirëse, rritjen e ndërgjegjësimit dhe krijimin e kushteve më të mira për studentët me aftësi të kufizuara në institucionet e arsimit të lartë. Pjesëmarrësit u informuan gjithashtu për fazat e implementimit të projektit, rezultatet e pritura, si dhe rolin e rëndësishëm që UKZ do të ketë në këtë iniciativë.
Në përfundim të sesionit, Universiteti Publik “Kadri Zeka” falënderoi studentët dhe stafin e pranishëm, duke nënvizuar rëndësinë e zhvillimit të një ambienti universitar gjithëpërfshirës dhe të qasshëm për të gjithë./Gjilani INFO/
