Me aktivitete të ngjeshura është hapur Manifestimi Kulturor Mbarëkombëtar “Flaka e Janarit 2026”, ndërsa ka kulmuar në mbrëmje me ndezjen simbolike të Flakadanit të “Flakës së Janarit”, që njëherit shënon hapjen zyrtare të manifestimit të këtij viti, në kujtim e nderim të gjithë heronjve, dëshmorëve e martirëve të kombit ndër breza.
Në hapje të manifestimit, gjegjësisht në ceremoninë e ndezjes së flakadanit, u organizua një defile nga të rinjtë në qendër të qytetit, për të përçuar mesazhin e lirisë dhe kontributit të dëshmorëve, ndërsa rrjedha e ceremonisë vijoi në platonë e Teatrit të Qytetit ku edhe u bë ndezja simbolike e Flakadanit.
Në ceremoni morën pjesë përfaqësues institucional dhe drejtues të shoqatave të dala nga lufta, ndërsa Ahmet Isufi, Ish-komandant i Ushtrisë Çlirimtare të Kosovës (UÇK), në Zonën Operative të Karadakut., në fjalën e tij nënvizoi kontributin e të rënëve të të gjithë brezave për lirinë që sot po e gëzojmë.
“Ky flakadan u ndez sonte në shenjë nderimi të heronjve Rexhep Mala e Nuhi Berisha sepse ishin të parët që pas luftës së dytë botërore rezistuan me armë kundër okupatorit serb. Krismat e tyre paralajmëruan lindjen e Ushtrisë Çlirimtare të Kosovës. Nga ajo periudhë kurrë nuk pushoi rezistenca për Liri e Pavarësi të vendit tonë”, tha Isufi.
E për ta madhështuar ceremoninë nga aspekti artistik/muzikor, u përkujdes Orkestra Frymore “Selman Vokshi”, e cila me pika të përzgjedhura prezantoi vepra të kompozitorëve tanë të shquar, për t’i dhënë karakter të denjë edhe nga ana artistike ceremonisë simbolike të ndezjes së Flakadanit.
Manifestimi “Flaka e Janarit” edhe sivjet ka parapa një varg aktivitetesh të ngjeshura, në katër shtyllat e saj kulturore: Arte pamore, letrare, skenike e muzikore, deri më 31 janar kur mbyllet me ceremoninë e ndarjes së çmimeve për më të mirët në fushat përkatëse, ndërsa pritet të sjell në Gjilan qindra artistë e artdashës nga mbarë hapësira shqiptare. /GJILANI INFO/
