Gazetaria kosovare ka humbur një prej emrave të saj të njohur. Pas një beteje me sëmundjen, ka ndërruar jetë gazetari Nexhmedin Ymeri, duke lënë pas një trashëgimi të çmuar profesionale dhe njerëzore.
Lajmi për vdekjen e tij është bërë i ditur nga familja, e cila përmes një njoftimi ka shprehur dhimbjen e thellë për humbjen e më të dashurit të tyre.
“Me dhimbje të thellë njoftojmë familjarët, miqtë dhe dashamirët se sot, më 14.07.2026, pas një beteje me sëmundjen, ndërroi jetë babai ynë i dashur, Nexhmedin Ymeri. Me fjalë nuk mund të përshkruhen veprat dhe mirësia jote. Ato do të mbeten dëshmia më e bukur e jetës që ke jetuar. Të qoftë i lehtë dheu i Kosovës. Allahu të mëshiroftë dhe të shpërbleftë me Xhenetin Firdeus”, thuhet në njoftimin e familjes.
Nexhmedin Ymeri do të kujtohet për përkushtimin e tij ndaj profesionit të gazetarit, kontributin në informimin e publikut dhe respektin që gëzonte në mesin e kolegëve dhe bashkëpunëtorëve.
Sipas njoftimit të familjes, ceremonia e varrimit do të mbahet të mërkurën, më 15 korrik 2026, pas namazit të ikindisë, në ora 16:30./Gjilani INFO/
