Në kuadër të mbështetjes për bujqit e komunës së Vitisë, sot janë shpërndarë foli najloni për 50 fermerë të kësaj komune, që merren me kultivimin e shalqirit.
Në ceremoninë e ndarjes së subvencioneve, i pranishëm ishte edhe kryetari i komunës Sokol Haliti, i cili mes tjerash tha se do të vazhdojnë të jenë të përkushtuar që të mbështesin sektorin e bujqësisë, por edhe fushave të tjera si perimtari, pemëtari etj.
Drejtori i Drejtorisë për Bujqësi, Pylltari dhe Zhvillim Rural, Naim Pira, tha se kjo mbështetje sadopak do ti ndihmoj bujqit.
Duke folur rreth procedurave të aplikimit për subvencione nga Ministria e Bujqësisë, Pylltarisë dhe Zhvillimit Rural, drejtori Pira tha se ka filluar aplikimi dhe procesi është duke shkuar mirë.
“Drejtoria e Bujqësisë, i ka bërë gjitha përgatitjet. Deri më sot janë mbi 400 aplikime dhe deri më 25 maj kur përmbyllet afati, besojmë se do të arrijmë të përfshijmë numrin e konsiderueshëm të atyre bujqve që aplikojnë për subvencione. Përpos këtyre, ne jemi në përgatitje për përgatitjen edhe për subvencione të tjera nga Drejtoria për Bujqësi, Pylltari e Zhvillimin Rural”, ka thënë Pira./Gjilani Info/
