Grupi punues për hartimin e Draft-Rregullores Komunale dhe Planit të Veprimit për Transparencë në bashkëpunim me OSBE ka mbajtur punëtori për të prezantuar këto dy dokumente.
Të pranishëm në këtë punëtori ishin grupi punues, përfaqësues të OSBE-së, Shefi i kabinetit të kryetarit, Kryesuesi i Kuvendit Komunal, drejtorë të drejtorive komunale, Drejtori i Njësisë së Auditimit, Shefi i Prokurimit, Shefi i Njësisë së Integrimeve Europiane, zyrtarë të Zyrës Ligjore, zyrtarë të tjerë komunal.
Punëtorinë e hapi Kryesuesja e Grupit Punues, Valdete Berisha, ku paraqiti rëndësinë e këtyre dy dokumenteve.
Ajo theksoi se me anë të kësaj Draft-Rregulloreje përcaktohen rregullat që sigurojnë transparencë të punës së organeve komunale, kryetarit të komunës, drejtorive, kuvendit, trupave të kuvendit si dhe mekanizmave të tjerë ligjor, si dhe rregullat, parimet dhe format e përfshirjes së qytetarëve, shoqërisë civile dhe grupeve të interesit në proceset vendimmarrëse.
Sipas saj edhe Plani i Veprimit për Transparencë Komunale ka për qëllim t’i ofrojnë publikut qasje të lehtë në monitorimin dhe zbatimin e politikave nga organet e komunës, duke përfshirë informim të shpejtë, të dhëna të qasshme, publikim të të gjitha akteve normative dhe dokumenteve me interes publik, si dhe rritje të mundësive të pjesëmarrjes së qytetarëve në proceset vendimmarrëse.
Shefi i kabinetit të kryetarit, Vaxhid Rexhepaj, theksoi se transparenca është çelësi që hap mundësi për një qeverisje më të mirë dhe më të efektshme dhe se me transparencë sigurohet që fondet publike të menaxhohen me integritet dhe që çdo vendim që ka ndikim në jetën e qytetarëve të jetë i arsyeshëm dhe i bazuar në nevojat e tyre reale.
Pas prezantimit të dy dokumenteve, është hapur punëtoria për komente nga të pranishmit.
Zyrtarët nga OSBE, Faruk Dërmaku dhe Fatmir Zylfijaj folën mbi rëndësinë e këtyre dy draft dokumenteve të cilat burojnë nga Udhëzimi Administrativ për Komuna të Hapura, dhe mundësojnë rritje të komunikimit mes qytetareve dhe komunës.
Poashtu u adresuan edhe komente të tjera si lidhur me publikimin e raportit të auditorit të brendshëm, publikimin e njoftimeve të prokurimit, verifikimin e peticioneve si dhe komente të tjera të cilat do të shqyrtohen nga grupi punues./GJILANI INFO/
