Maturantët e Shkollës së Mesme “Xhavit Ahmeti” në Gjilan patën mundësinë të zhvillojnë një takim informues me përfaqësuesit e Universitetit Publik “Kadri Zeka”, me qëllim të orientimit të tyre drejt zgjedhjeve të duhura akademike dhe profesionale pas përfundimit të shkollimit të mesëm.
Të shoqëruar nga profesorët e tyre, Enver Sadiku dhe Enver Rexhepi, maturantët u njoftuan nga Dekani i Fakultetit të Shkencave Sociale, Prof. Asoc. Dr. Selim Daku, si dhe Prodekani i kësaj njësie akademike, Prof. Ass. Dr. Blerim Haziri, për ofertën akademike të universitetit, duke përfshirë programet studimore, si dhe mundësitë për zhvillim profesional që ofron UKZ.
Gjatë prezantimit, përfaqësuesit e universitetit theksuan rëndësinë e zgjedhjes së drejtimit të duhur studimor, duke i inkurajuar maturantët që të ndjekin interesat dhe aftësitë e tyre personale. Ata gjithashtu ndanë informacione mbi kushtet e studimit, përfitimet që ofrohen për studentët, si dhe perspektivat e punësimit pas përfundimit të studimeve.
Një pjesë e rëndësishme e këtij takimi ishte bashkëbisedimi i hapur me maturantët, të cilët shprehën interes të madh dhe parashtruan pyetje të ndryshme lidhur me drejtimet studimore, procedurat e regjistrimit, praktikat profesionale dhe mundësitë për avancim në karrierë. Përfaqësuesit e universitetit u përgjigjën në mënyrë të detajuar, duke ofruar këshilla konkrete dhe të dobishme për hapat e ardhshëm të maturantëve.
Në fund të vizitës, maturantët shprehën mirënjohjen e tyre për përfaqësuesit e Universitetit Publik “Kadri Zeka” për kohën dhe informacionet e ofruara, duke e cilësuar këtë takim si shumë të dobishëm dhe motivues për rrugëtimin e tyre të ardhshëm akademik./Gjilani INFO/
