Banorët e brezit kufitar nga Karaçeva e Kamenicës, nuk ndihen të sigurtë tash e më tepër se dy dekada, ngase forcat policore dhe ushtarake serbe, që nga viti 2001, provokojnë popullatën e këtushme, duke u futur here pas here brenda teritorit të Kosovës, tha Selver Lenjani, aktualisht kryetar i Këshillit të Fshatit në Karaçevën e Poshtme.
‘’Gjendjen e sigurisë në këtë pjesë të brezit kufitar, nuk e kemi të mirë , ngase forcat policore e ushtarake serbe here pas here futen 500 metra brenda teritorit të Kosovës, pa KFOR-in dhe Policinë e Kosovës, duke ngjallur kështu frikën për banorët e kësaj ane”, thotë Lenjani, i cili vazhdimisht ka ngritur shqetësime tek autoritetet e vendit dhe ato ndërkombëtare.
Ai thotë se popullata e këtushme do të ndihej e sigurtë, sikur t’i kishte të pranishme vazhdimisht KFOR-in dhe Policinë e Kosovës.
Sipas tij, me këtë çështje duhet të merren autoritetet vendore dhe Brukseli zyrtar.
Nga ana tjeter, Lenjani shprehet i zhgënjyer edhe me gjithë kryeministrat e vendit, që sipas tij, nuk kanë bërë punën e duhur për zgjidhjen e këtij problemi.
“Kemi pas premtime prej tyre vetëm derisa ishin në opozitë, kurse me ardhjen në pushtet, përkatësisht në postet e kryeministrave, asnjëri prej tyre nuk është marrë me problemin që ne banorët e brezit kufitar kemi”, shprehet Lenjani.
Ai tërheq vëmendjen kah problem në fjalë, duke theksuar se atje, afër vijës kufitare Kosovë-Serbi, jetojnë jo më pak se 3 mijë e 200 banorë.
Sipas tij, kjo pjesë e Kosovës duhet të ruhet si dhe të vëhet në rend dite që të zgjidhet ky problem njëherë e përgjithmonë.
Kurse, pyetja e tij për autoritetet relevante vendore dhe ndërkombëtare është se kur do të marrin fund provokimet e forcave serbe në brezin kufitar Kosovë-Serbi?/GJILANI INFO/
