Zyra për Marrëdhënie me Publikun e LDK-së në Gjilan përmes një reagimi vlerëson se pushteti me drona i VV-së në Gjilan brenda një rreze prej 500 m2, po i bën katër shkelje të rënda, të cilat përbëjnë katër vepra penale
“Brenda një rrezeje prej 500 m², pushteti me drona i VV-së në Gjilan po i bën katër shkelje të rënda dhe, rrjedhimisht, katër vepra penale, përfshirë projekte pa leje dhe uzurpime pronash, duke e lënë qytetin e Gjilanit në mëshirën e të tjerëve. Kjo është një pasqyrë e qartë e mungesës së kontrollit dhe administratës së dobët, ku çdo ditë shkeljet e ligjit bëhen gjithnjë e më të dukshme”, thuhet në reagimin e LDK-së.
“Megjithatë, më shumë punë dhe angazhim po shfaqin figura si hoxha i nderuar dhe bamirësi Halil Kastrati, së bashku me shoqatën e tij, si dhe Naim ef. Aliu, në emër të Bashkësisë Islame në Gjilan, se sa administratori aktual i Komunës, i cili, për më shumë se tre vite, nuk ka punuar asgjë duke thënë se opozita e pengon në punën e tij”, thuhet në reagim.
“Në vend që të investohet në zhvillimin e qëndrueshëm dhe mbrojtjen e interesave të qytetarëve, administrata aktuale po qëndron indiferente përballë kësaj situate. Halil Kastrati dhe Naim ef Aliu, përkundër rolit të tyre humanitar, janë angazhuar më shumë për të mbështetur ata që janë të prekur nga pasiguria dhe padrejtësitë, ndërsa Komuna e Gjilanit është në pritje të një administrate që të mund të ndalë këtë rrugë të shkatërrimit”, vazhdon reagimi i LDK-së së Gjilanit.
““Prekja” e tokës jashtëligjshëm, duke u bazuar në uzurpime dhe projekte të paligjshme, nuk është vetëm një shkelje e ligjit, por është një veprim që do të ndikojë negativisht për breza me radhë. Të gjitha këto veprime, të cilat dëmtojnë pasuritë publike dhe krijojnë një precedent të rrezikshëm, do ta dëmtojnë të ardhmen e qytetarëve të Gjilanit dhe do të ndalin zhvillimin e qëndrueshëm të këtij qyteti. Kjo mund të çojë në pasiguri, humbje mundësish për gjenerata të tëra, dhe krijimin e një klime të mbyllur ku interesat personale do të mbizotërojnë mbi ato publike”, thuhet në fund të reagimit bërë nga Zyra për Marrëdhënie me Publikun e LDK-së në Gjilan. /GJILANI INFO/
