Të pranishëm në këtë seancë ishin Kryesuesi i Kuvendit, Liridon Kastrati, përfaqësuesi i OVL-UÇK-së dega në Kamenicë, Milaim Limoni, asambleistë, drejtorë të Drejtorive Komunale, komandanti i stacionit policor në Kamenicë, Florim Klaiqi, përfaqësues të policisë kufitare, familjarë të dëshmorëve, zyrtarë komunal, qytetarë.
Kryesuesi i Kuvendit, Liridon Kastrati, e hapi këtë seancë solemne me një minut heshtje për dëshmorët e rënë.
Në fjalën e tij ai tha se janë mbledhur në këtë seancë për të përkujtuar një nga datat më të ndritura 18 Qershorin, Ditën e Çlirimit të Kamenicës.
“Kjo ditë nuk është thjesht një datë kalendarike, po thekson një simbol të sakrificës, lirisë, dhe fitores së popullit tonë ndaj agresionit serb. Me 18 qershor të vitit 1999, Ushtria Çlirimtare e Kosovës bashkë me trupat e NATO-s, zbarkuan në qytetin tonë për të shpallur çlirimit të qytetit dhe duke i dhënë fund okupimit barbar serb. Sot nderojmë djemt dhe vajzat me të mira të kësaj toke që ranë për lirinë tonë, ata janë themel i lirisë, i luftës, çlirimit dhepavarësisë së vendit tonë. Ne jemi trashëgimtar të një lufte të drejtë dhe të shenjtë të Ushtrisë Çlirimtare të Kosovës për liri dhe pavarësi. Lavdi të gjithë dëshmorëve të rënë për liri, urime Dita e Çlirimit”, ka thënë ai.
Edhe përfaqësuesi i OVL-UÇK-së dega në Kamenicë, Milaim Limoni, ka uruar për Ditën e Çlirimit, duke thënë që sakrifica e dëshmorëve për lirinë që jetojmë sot nuk do të harrohet kurrë.
Pas seancës solemne janë bërë homazhe tek varrezat e dëshmorëve./GJILANI INFO/
