Kuvendi i Komunës së Gjilanit, nën udhëheqjen e Kushtrim Kadriut, kryesues, në seancën e sotme të rregullt e cila është e fundit për këtë vit, ka miratuar planin e punës për vitin 2025 dhe orarin e mbajtjes së mbledhjeve të Kuvendit dhe komiteteve për vitin 2025, raportin e punës së KKSB-së për vitin 2024, planin e punës së KKSB-së për vitin 2025, vendimin për caktimimin e kompensimit për anëtarët e Komisionit për dhënien e titujve të nderit, çmimeve, mirënjohjeve dhe shpërblimeve e plotësim-ndryshimin e Komisionit për shqyrtimin e ankesave dhe kerkesave në procesin e emërtimit te rrugëve.
Po ashtu, kuvendarët e Gjilanit kanë miratuar plotësim-ndryshimin e Komisionit për shqyrtimin e ankesave dhe kërkesave në procesin e emërtimit te rrugëve, kërkesën për ndarjen e parcelës me nr. 04787-0 për ndërtimin e shtatores të heroit Jusuf Baftjarit (Hoxhë Lipovica), kërkesën e OVL UÇK-së për ndarjen e mjeteve në vlerë prej 17 mijë euro për ndërtimin e obeliskut të dëshmorëve të UÇPMB-së, kërkesën e banorëve të fshatit Brecalc për ndarjen e një parcele për interes publik, kërkesën e shoqatës së Down Sindrom Kosova për mbështetje financiare, rekomandimin ndaj Zyrës së Kryetarit për mbështetjen financiare për prof. Dr. Baftjar Kryeziun për botimin e dy librave, propozimin që tregu i kafshëve të emërtohet me emrin “Hamdi Mehmeti (Pasjaku)”, sikurse edhe kërkesën e DKRS-së për mbulimin e borxheve nga thirrja publike 2024, por pa “Flakën e Janarit”.
Pika në të cilën pati mospajtime të thella e kualifikime të ndërsjella në raportin pozitë-opozitë ishte raporti i Zyrës Kombëtare të Auditimit për pasqyrat financiare vjetore të Komunës së Gjilanit për vitin 2023.
Drejtoresha e Administratës, Arbenita Sopi – Haziri, pasi prezantoi planin i veprimit për zbatimin e Rekomandimeve të Zyrës Kombëtare të Auditimit, tha se pos që trashëguan borxhe nga e kaluara, për gjetjet e ZKA-së për vitin 2023 tha se janë probleme të trashëguara nga qeverisjet e kaluara që prej vitit 2010, për të shtuar se tashmë është vendosur një standard i ri në qeverisje.
Shefi i grupit të këshilltarëve të PDK-së, Bujar Nevzati, tha se ky raport e vlerëson negativisht Gjilanin, për parregullsi e keqpërdorime të mëdha, duke shtuar se nga 15 rekomandime vetëm 7 janë zbatuar, ndësa Avdyl Aliu, shef i grupit të LDK-së, pohoi se në qeverisjet e kaluara Komuna e Gjilanit ka pasur gjithmonë opinion të mirë, përderisa, sipas tij, opinionin e kualifikuar e instaloi qeverisja aktuale, për të shtuar se si pasojë e kësaj, Komuna është e përjashtuar nga të gjitha grantet.
Në këtë seancë, në mënyrë ceremoniale, fëmijët me aftësi të kufizuar të qendrës së kujdesit ditor “Pema”, u kanë shpërndarë kartolina festive asambleistëve të Kuvendit.
Ndryshe, në mbledhjen IX kanë marrë pjesë në diskutim me kërkesa e pyetje edhe asambleistët Avdyl Aliu, Imran Haziri, Krenare Latifi-Kqiku, Muhadin Haziri, Bujar Nevzati, Ardhmërie Musliu, Latif Maliqi, Ismajl Kurteshi, Sami Ahmeti, Gentrit Murseli, Ganimet Sabedini, Gresa Avdiu, Ardita Ukshini, Gentrit Murseli, Sami Ahmeti, Ramiz Ramadani e Shpresa Kurteshi – Emini, të cilëve u është përgjigjur nënkryetarja Leonora Morina-Bunjaku dhe drejtorët komunalë, Ali Arifi, Herolinda Murati – Leka, Kushtrim Ibrahimi, Bekim Salihu, Hekuran Rapuca e Kushtrim Zeqiri./GJILANI INFO/
