Kryetari i Komunës së Kamenicës, Kadri Rahimaj, gjatë vizitës së tij zyrtare në Zvicër, ka marrë pjesë në një nga mbledhjet e Parlamentit të Qeverisë Kantonale të Cyrihut, së bashku me e Konsullin e Republikës së Kosovës në Zvicër, z. Vigan Berisha.
Kryetari Rahimaj ka thënë se gjatë mbledhjes parlamentare, ku zhvilloheshin diskutime dhe vendimmarrje të rëndësishme, në rend dite ishte edhe miratimi i buxhetit vjetor të kantonit, një buxhet prej 20 miliardë frangash.
Ndër të tjera i pari i komunës u takua edhe me z. Mario Fehr, anëtar kesaj Qeverie dhe drejtues i Departamentit për Siguri të Kantonit të Cyrihut, si dhe me z. Daniel Walfer, deputet i këtij kantoni dhe Kryetar i Komisionit për Siguri.
“Cyrihu por edhe kantonet e tjera njihen si vende shumë të sigurta për të jetuar, e një meritë të madhe për këtë e kanë z.Fehr e z.Walfer. Nuk munguan as diskutimet se si mund të realizohen bashkëpunime në fushën e sigurisë në mënyrë që praktikat e mira të mirren dhe të implementohen edhe nga ne. Vizitë pas vizite, përvojë pas përvoje, kudo po mësojmë diçka të re për ta bërë Kamenicën edhe më mire”, tha Kryetari Rahimaj, duke theksuar rëndësinë e përvojave ndërkombëtare në zhvillimin e politikave lokale.
Vizita në Cyrih konsiderohet një hap i rëndësishëm drejt forcimit të bashkëpunimit ndërinstitucional dhe shkëmbimit të përvojave në fushën e sigurisë./Gjilani INFO/
