Kryetari i Komunës së Gjilanit Alban Hyseni ka reaguar pas rastit të rëndë në Gjilan duke thënë se me dhimbje të thellë dhe tronditje të madhe mori lajmin për ngjarjen e rëndë që ndodhi sot në qytetin e Gjilanit, ku tre qytetarë humbën jetën dhe një tjetër u plagos si pasojë e të shtënave me armë zjarri.
“Në emrin tim personal dhe në emër të Komunës së Gjilanit, shpreh ngushëllimet më të sinqerta për familjet e viktimave dhe uroj shërim sa më të shpejtë për të plagosurit. Zemrat tona sot janë me ju”, ka thënë Kryetari Hyseni.
Sipas tij, ky akt i dhunshëm dhe i papranueshëm është një plagë e rëndë për komunitetin tonë.
“Ju siguroj se do të bashkëpunojmë ngushtë me organet e rendit dhe drejtësisë, që autori i këtij krimi të sillet para drejtësisë sa më shpejt.
Gjilani është qytet i paqes dhe bashkëjetesës, dhe ne nuk do të lejojmë që dhuna të marrë vend në jetën tonë të përditshme. Sot, më shumë se kurrë, kemi nevojë të qëndrojmë të bashkuar si komunitet”, ka thënë i pari i Gjilanit, Alban Hyseni. /GJILANI INFO/
