Kryetari I Komunës së Gjilanit, Alban Hyseni ka thënë se patën kënaqësinë dhe nderin të mirëpresin një delegacion të veçantë nga Shqipëria, i përbërë nga personalitete të shquara në fusha të ndryshme.
Në këtë vizitë morën pjesë: Prof. Dr. Av. Astrit Memia, kryetar i Forumit “Imazh & Media – Imazhi Shqiptar dhe Identiteti Kombëtar”. Bislim Hoti, ish-nënkryetar i Parlamentit të Kosovës. Idriz Brahimaj, Kryetar i KIKK. Lulëzim Kryeziu, humanistë nga Zvicra.
I pari i komunës shtoi se ky takim shërbeu si një moment i rëndësishëm reflektimi dhe bashkëpunimi mbi vlerat kombëtare, rolin e diasporës dhe promovimin e imazhit shqiptar në botë.
“Ishte një kënaqësi e veçantë të diskutojmë rreth sfidave dhe perspektivave për forcimin e unitetit dhe identitetit kombëtar. Gjithashtu, për mua ky takim pati një domethënie të veçantë, pasi pata nderin të pranoj Çmimin me titull: “Ambasador i Imazhit Shqiptar në Botë”, një vlerësim që më jep edhe më shumë motiv për të vazhduar punën dhe angazhimin tim në shërbim të gjithë qytetarëve”, tha i pari i Gjilanit, Alban Hyseni. /GJILANI INFO/
