Kryetari i Komunës së Vitisë, Sokol Haliti, ka pritur sot në një takim të veçantë mësimdhënësit e pensionuar Sevdie Hasani dhe Agush Haxhiu, me rastin e përfundimit të karrierës së tyre profesionale në arsim.
Në shenjë vlerësimi dhe mirënjohjeje për kontributin e dhënë ndër vite në edukimin dhe arsimimin e shumë gjeneratave të nxënësve, kryetari Haliti u ndau atyre mirënjohje për përkushtimin dhe angazhimin e tyre në misionin fisnik të mësuesit.
Me këtë rast, ai theksoi se puna e mësimdhënësve mbetet themel i zhvillimit të shoqërisë dhe i formimit të brezave të rinj, duke vlerësuar lart profesionalizmin dhe përvojën shumëvjeçare të Sevdie Hasanit dhe Agush Haxhiut në shërbim të arsimit.
Nga ana e tyre, dy mësimdhënësit falënderuan Komunën e Vitisë për vlerësimin e treguar, duke shprehur kënaqësinë që gjatë viteve të punës së tyre kanë pasur mundësinë të kontribuojnë në edukimin dhe arsimimin e të rinjve të kësaj komune.
Ky vlerësim simbolik është një dëshmi e respektit institucional për figurën e mësuesit dhe për kontributin e tyre të çmuar në ndërtimin e së ardhmes së shoqërisë./Gjilani INFO/
