Kryetari i Komunës së Gjilanit, Alban Hyseni, ka reaguar ashpër ndaj zhvillimeve të sotme në Asociacionin e Komunave të Kosovës, duke i cilësuar zgjedhjet për kryetar dhe kryesi si të parregullta dhe të ndikuara nga marrëveshje partiake.
Sipas tij, procesi zgjedhor është shoqëruar me shkelje serioze që, siç thekson, e dëmtojnë rëndë legjitimitetin e këtij institucioni.
Hyseni ka deklaruar se në vend të një gare të hapur dhe transparente, ka pasur koordinim të drejtpërdrejtë ndërmjet subjekteve politike Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës, për të ndikuar në rezultatet përfundimtare.
Ai ka theksuar se, ndonëse Lëvizja Vetëvendosje dhe LDK qeverisin me numër të barabartë komunash, janë përdorur mekanizma të brendshëm për të krijuar një avantazh artificial për palë të caktuara, duke anashkaluar vullnetin e qytetarëve.
Hyseni ka ngritur shqetësim edhe për përbërjen e Kuvendit të Asociacionit, duke pretenduar se disa nga pjesëmarrësit nuk janë deleguar sipas procedurave ligjore nga kuvendet komunale, çka sipas tij e bën të kontestueshëm çdo vendim të marrë.
Ai gjithashtu ka akuzuar për tentativa që posti i kryetarit të kalojë tek një subjekt i tretë përmes marrëveshjeve të parapërcaktuara dhe manovrave procedurale, duke shmangur standardet e garës së drejtë.
Sipas Hysenit, ndryshimet në rregullore dhe në strukturat drejtuese janë bërë pa respektuar procedurat, duke e kthyer Asociacionin në një instrument të interesave të ngushta politike, në vend të një mekanizmi përfaqësues për të gjitha komunat.
Në fund, ai ka bërë të ditur se nuk do ta pranojnë këtë proces dhe se do të ndjekin rrugët institucionale për ta sfiduar atë, me synim rikthimin e ligjshmërisë dhe përfaqësimit të drejtë në Asociacionin e Komunave të Kosovës./Gjilani INFO/
