Komuna e Kamenicës ka vazhduar programin e saj të mbështetjes për familjet me foshnja të sapolindura, duke shpërndarë 31 pako BABY BOX për përfituesit e radhës.
Gjatë ceremonisë së shpërndarjes, kryetari i komunës, Kadri Rahimaj, uroi prindërit për zgjerimin e familjeve të tyre dhe theksoi përkushtimin e institucioneve komunale për të mbështetur mirëqenien e fëmijëve dhe prindërve.
Ai bëri të ditur se pakot janë përgatitur për të përmbushur nevojat bazë të foshnjave gjatë vitit të parë të jetës, por përmbajnë edhe produkte të nevojshme për kujdesin ndaj nënave.
“Çdo lindje është një gëzim për komunën tonë. Përmes këtyre pakove dhe mbështetjes financiare që ofrojmë, synojmë të jemi pranë familjeve në një nga periudhat më të rëndësishme të jetës së tyre”, ka deklaruar Rahimaj.
Përveç pakove BABY BOX, Komuna e Kamenicës vazhdon të ofrojë edhe mbështetje financiare për familjet me fëmijë të sapolindur, në vlerë prej 200 euro për fëmijën e parë, 250 euro për të dytin dhe 300 euro për fëmijën e tretë.
Kjo është shpërndarja e dytë e pakove BABY BOX gjatë vitit 2026. Nga komuna është bërë e ditur se edhe përfituesit e tjerë që ndodhen në listën e pritjes do të njoftohen sapo të sigurohen pako të reja./Gjilani INFO/
