Altin Zogaj nga Kosova, i cili jeton në Gjermani, ka nisur të shijojë sukseset në ring. Ai për një kohë të shkurtër ka treguar talentin e tij, duke kaluar shpejt nga boksi amator tek ai profesional.
Zogaj, i cili me orgjinë është nga Drenasi, ka rrëfyer për Zeri.info eksperiencën e tij në ring, fillimet e tij në vitin 2015 dhe fitoret në çdo meç që ka pasur deri më tani e deri te planet e tij për të ardhmen.
Ai tregon se nga viti 2018 ka kaluar në boksin profesionist, ndërsa në nëntor të vitit të kaluar është shpallur kampion i Gjermanisë në peshën gjysmë të rëndë.
“Prej vitit 2015 kam filluar me boks si amator, pastaj nga maji i vitit 2018 kam kaluar te profesionistët. Unë ushtroj në Stuttgart te Gjermanisë te trajneri Conny Mittermeier. Deri në boksin profesional i kam pasur 8 meçe dhe prej të gjitha i kam fituar, ku në nëntor të vitit të kaluar kam fituar brezin e parë të kampionit të Gjermanisë në peshën gjysmë të rëndë (79,3 kg)”, thotë Zogaj.
Ai më tej thotë se aktualisht po përgatitet për ta mbrojtur titullin, ku luftën për mbrojtje do ta zhvillojë më 4 qershor të këtij viti, ndërsa pret mbështetje edhe të bashkatdhetarëve që gjenden atje.
Ky meç, i cili do të zhvillohet në Wangen Im Allgäu, do të transmetohet live në RTK1 prej orës 21:30.
“Përgatitjet për ketë sfidë i kam 12 javë rresht, sepse duhet maksimalisht me ka i pergaditur pasi janë 10 raunde. Në këto përgatitje me trajner pak më shumë e kemi pas fokusin në forcë. Tash jam ne fazën e sparringut e cila zgjat 3 javë edhe shpresojë që do ta kalojë këtë fazë pa probleme pasi jam duke u ndjerë tepër në formë. Javën tjeter e kam javën e fundit edhe ajo është java më e mirë sepse është më shumë për regjenerim që pastaj unë të jap 100% nga vetja”, tregon Zogaj.
Ai tregon se çdo herë me krenari përmend origjinën e tij, ndërsa ndihet edhe më shumë krenarë me mbështetjen e shqiptarëve atje të cilët i pret të jenë të shumtë në numër më 4 qershor kur do ta mbrojë titullin.
“Jam shumë krenar sepse do të ketë shumë tifozë shqiptarë në event për të më përkrahur. Unë prej fillimit të karrierës deri në fund ka me boksuar për ta përfaqësuar Kosovën dhe krejt shqiptarët”, thotë Zogaj, duke treguar se pret që në këtë përballje do të jetë i pranishëm edhe boksieri i njohur Luan Krasniqi
“Është shumë interesant, më herët unë Luanin e kam shikuar duke boksuar e tash Luani do të sheh qysh boksojë unë”, thotë ai.
Krejt në fund ai tregoi planet e tij për të ardhmen, duke folur me mabicie për tu shpallur kamion i Evropës por edhe Botës.
“Planet janë ta mbroj titullin dhe te orientohem drejt kampionit te Evropës, hap pas hapi deri te kampioni i botës, ky është qëllimi im”.
Përveç kësaj, boksieri i cili po shënon suksese të vazhdueshme, është falënderues ndaj atyre që po mbështesin karrierën e tij.
“Jam mirënjohës nga sponsorët e mi që më mundësojnë të merrem vetëm me boks e me asnjë tjetër punë; Göl Fresh Market, Interna Stuttgart, Wolf Bauunternehmen GmbH, Latif Destani Maler GmbH”, PS Bau GmbH, DABA GmbH dhe PMSC GmbH”, thotë në fund Zogaj, duke i falënderuar të gjithë ata që po e përkrahin.
