Komuna e Kamenicës për dy ditë radhazi ka qenë nikoqire e profesionistëve studiues të fushave të ndryshme si arkeologjisë, trashëgimisë kulturore, demografisë, ekonomisë, gjuhësisë, të cilët morën pjesë në konferencën e parë shkencore kombëtare “Kamenica në Rrjedhat e Historisë”.
Në këtë konferencë e cila u organizua nga Drejtoria e Kulturës, Rinisë dhe Sportit në bashkëpunim me Drejtorinë e Arsimit, Këshillin Shkencor dhe Këshillin Organizativ, këta profesionistë paraqiten punimet e tyre që kishin të bëjnë me Kamenicën dhe historinë e saj.
Kryetari i Komunës, Kadri Rahimaj, duke falënderuar të gjithë pjesëmarrësit ka thënë se është nder i madh që kjo ngjarje e rëndësishme po realizohet për komunitetin tonë, për Kamenicën dhe për të gjithë ata që duan të zbulojnë dhe vlerësojnë historinë tonë të pasur dhe të lavdishme.
“Kur flasim për Kamenicën, flasim për një qytet që ka kaluar përmes shekujve, që ka jetuar ngjarje të mëdha dhe ka mbajtur një trashëgimi të pasur, të formuar nga kultura, tradita dhe lufta për liri. Kamenica është një qytet që nuk është vetëm pjesë e historisë, por është vetë një shkrim i pandalshëm i saj. Dhe, pikërisht këtu, në këtë moment, ne e sjellim këtë histori përpara jush, për të reflektuar dhe për të mësuar së bashku. Për disa, historia është një kalendar i ftohtë datash dhe ngjarjesh, por për ne, historia është gjithçka që na lidh me të kaluarën. Është pasuria që na bën të kuptojmë vlerat e së tashmes dhe të ndërtojmë një të ardhme më të mirë. Kjo është arsyeja pse kjo konferencë, me temën e saj të thellë, “Kamenica në Rrjedhat e Historisë”, është një mundësi e artë për të rishikuar, diskutuar dhe reflektuar mbi të kaluarën, që padyshim do të formësojë të ardhmen tonë”, ka thënë Kryetari Rahimaj.
I pari i komunës këtë konferencë e ka konsideruar si një mundësi për të studiuar dhe analizuar, por është një mundësi për të bashkuar mendje dhe zemra, për të thelluar lidhjet mes nesh dhe për të promovuar dialogun e hapur dhe të thellë mbi atë çka na bën kush jemi.
“Ky është një hap i rëndësishëm për të ruajtur dhe për të pasuruar atë që kemi arritur, dhe për të ndihmuar brezat e ardhshëm të kuptojnë rëndësinë e asaj që kemi kaluar. Andaj ne jemi këtu sot për të shprehur mirënjohjen tonë për ju që kontribuoni në kërkimin shkencor dhe që, me punën dhe pasionin tuaj, i jepni jetë historisë. Ju, duke nxjerrë në pah trashëgiminë tonë historike, jo vetëm që na jepni mundësinë për të mësuar, por edhe për të pasuruar dhe zhvilluar Kamenicën, Kosovën dhe trojet shqiptar, për të kuptuar vlerën e pasurive tona kulturore dhe historike”, ka theksuar ai duke falënderuar të gjithë ata që kanë mundësuar këtë ngjarje.
Ndërsa Profesor Nexhat Rexha nga Këshilli Organizativ tha se të gjitha punimet që do të paraqiten në këtë konferencë do të botohen në një libër të veçantë.
“Është e rëndësishme që jemi bashkë për ta rishpalosur dhe shkundur pluhurin e historisë apo të shekujve, sepse kjo trevë ka një jetëgjatësi shumë të madhe të rëndësishme, dhe besoj që në aspektin shkencor ju do t’i parashtroni pikëpamjet tuaja”, është shprehur ai.
Në konferencë 51 studiuesit profesionist paraqitën kumtesat e tyre të ndara në tetë sesione me këto tema:
- Kamenica në antikitet dhe mesjetë;
- Periudha osmane dhe kolonizmi serb;
- Luftrat, rezistenca dhe lëvizjet patriotike në shekullin XX;
- Historia më e re, media dhe informimi;
- Arsimi;
- Trashëgimia kulturore;
- Tranzicioni, demografia dhe zhvillimi ekonomik;
- Gjuhësia.
Kjo konferencë është përmbyllur me ndarjen e certifikatave për të gjithë pjesëmarrësit./GJILANI INFO/
