Kreu i LDK-së së Gjilanit, Lutfi Haziri, i cili njëherësh ishte edhe kandidat për deputet në Kuvendin e Kosovës, iu është drejtuar qytetarëve gjilanas duke i falënderuar që ishin pjesë e fushatës elektorale në Gjilan, që ishin në manifestime për ta dëgjuar programin e për t’i dhënë LDK-së dashni.
“Jemi krenarë që së bashku tashmë në Gjilan kemi filluar rrugën tonë për rikthimin e madh të LDK-së. Ky është veç fillimi i këtij procesi e na pret shumë punë e angazhim bashkë deri në vjeshtë, për t’i dhënë Gjilanit formë, besim, shpresë e dashni”, ka thënë Haziri.
Ai tha se po presin zbardhjen e emrave të deputetëve që do ta përfaqësojnë LDK-në në Kuvend dhe se zotohen që me punë t’ua kthejnë dashninë e qytetarëve që patën për LDK-në.
“Asgjë nuk ndryshon tek ne sepse Gjilanin e duam pa kusht. Do të mbetem gjithmonë, Luta Juaj”, ka thënë Lutfi Haziri, kryetar i LDK-së së Gjilanit, njëherësh kandidat për deputet në Kuvend të Kosovës./GJILANI INFO/
