Gjimnazi “Kuvendi i Lezhës” në Viti, sot ka shënuar Ditën e Shkollës, njiherit 50 vjetorin e pavarësimit të këtij Gjimnazi, ku në vitin 1972-73, u pavarësua nga Gjimnazi “Zenel Hajdini” në Gjilan. Në këtë manifestim , të pranishëm ishin strukturat komunale, veteran të arsimit, personalitete nga jeta publike e institucionale, profesor, nxënës e qytetar të tjerë. Një fjalë rasti e mbajti zv.kryetari i komunës së Vitisë Hasan Aliu, i cili mes tjerash tha se është nder dhe kënaqësi e veçante që në emër të institucioneve komunale të Vitisë, dhe në emër të qytetarëve të kësaj komune, të shpreh urimet me rastin e Ditës së Shkollës, respektivisht Besëlidhjes së Lezhës, që në historinë shqiptare shënon një hap përpara bashkimit politik të tokave shqiptare.
“Mësimet e Kuvendit të Lezhës dhe vendimeve të tij, modeli i bashkimit dhe mënyra e bashkëpunimit, janë kurdoherë si pikë referimi për ndërtimin e së tashmes dhe së ardhmes sonë të përbashkët. Sot, kjo shkollë që mban emrin e Kuvendit të Lezhës, shënon 50 vjetorin e pavarësimit të Gjimnazit në Viti, vit ky jubilar, ku që nga viti 1972, pjesë e këtij institucioni kanë qenë me qindra mësimdhënës, udhëheqës, staf administrativ e punëtor teknik , të cilëve u shpreh falënderimin tim më të thellë, e admirimin tim më të madh, për kontributin në edukimin dhe formimin qytetarë të fëmijëve tanë. Gjimnazi Kuvendi i Lezhës, ka qenë dhe mbetet vatra e dytë e ngushtë familjare ,vatra e dijes dhe e formimit profesional e fëmijëve tanë”, tha Aliu.
Një fjalë rasti mbajti edhe drejtoresha e Arsimit në Viti Arta Ajeti, Sami Hoxha drejtor i Gjimnazit “Zenel Hajdini” në Gjilan dhe drejtori i Gjimnazit ‘Kuvendi i Lezhës” në Viti Mujë Tafa.
Me rastin e Ditës së Shkollës, u bë edhe promovimi i librit të Prof. Ass. Dr. Nexhmedin Bardhi, “Shkollat shqipe në Anamoravë, Arsimi i mesëm 1969/2023 Gjimnazi Kuvendi i Lezhës. E në pjesën e dyte të manifestimit, u shfaq edhe një program artistik nga nxënësit e shkollës, për të pranishmit./GJILANI INFO/
