Komuna e Gjilanit do të përfitojë mbi 2 milionë euro për realizimin e projekteve në kuadër të Projektit të Banimit Social Adekuat, me qëllim përmirësimin e kushteve të jetesës për familjet në nevojë.
Marrëveshja e Grantit është nënshkruar sot nga ministrja e Ministrisë së Mjedisit dhe Planifikimit Hapësinor, Fitore Pacolli, dhe kryetari i Komunës së Gjilanit, Alban Hyseni.
Sipas ministres Pacolli, për Gjilanin janë ndarë gjithsej 2 milionë e 30 mijë euro, të cilat do të investohen në realizimin e 33 njësive të banimit.
Projekti parasheh ndërtimin e 25 njësive të reja të banimit social, ndërsa pjesa tjetër e mjeteve do të përdoret për renovimin e dy shtëpive private dhe rindërtimin e gjashtë shtëpive të tjera.
Pacolli e ka cilësuar këtë investim si një hap konkret drejt rritjes së stokut të banimit social dhe krijimit të kushteve më të mira për familjet që kanë nevojë për mbështetje.
Edhe kryetari i Gjilanit, Alban Hyseni, ka vlerësuar rëndësinë e projektit, duke theksuar se investimi do të ndikojë drejtpërdrejt në përmirësimin e kushteve të jetesës së qytetarëve.
“Ky është një hap konkret drejt rritjes së banimit social në qytetin tonë, si dhe drejt ofrimit të kushteve më të mira të jetesës për familjet që kanë më së shumti nevojë për mbështetje”, ka deklaruar Hyseni.
Ai ka falënderuar ministren Pacolli dhe Qeverinë e Kosovës për bashkëpunimin dhe gatishmërinë për të mbështetur projekte që synojnë përmirësimin e cilësisë së jetesës së qytetarëve të Gjilanit./Gjilani INFO/
