Njësia Sektoriale e Policisë së Kosovës së bashku me Njësitin e Komunitetit të Stacionit Policor në Gjilan, kanë mbajtur sot ligjëratë me temën “Siguria në Internet” në shkollën fillore “DonBosko” të Gjilanit.
Ligjeratën e kanë përcjellur mbi 200 nxënës të klasave gjashtë dhe nëntë, gjatë të cilës janë trajtuar çështje që ndërlidhen me sigurinë në internet, keqpërdorimet, ngacmimet, shantazhet online, si dhe mënyrat e parandalimit të këtyre dukurive.
Nxënësit janë informuar për veprimet që duhet ndërmarrë në raste të tilla dhe për masat ligjore përkatëse.
Ndërkaq, këto njësite kanë mbajtur ligjëratë edhe në shkollën fillore “Skënderbeu” në fshatin Përlepnicë, me temën “Dukuri negative në shoqëri dhe Drogat”, ku kanë marrë pjesë nxënësit e klasave shtata e të teta të kësaj shkolle.
Personeli arsimor dhe nxënësit e këtyre shkollave kanë mirëpritur ligjëratën, duke vlerësuar se kanë qenë të dobishme dhe kanë ofruar njohuri të reja.
Policia e Kosovës mbetet e përkushtuar në vazhdimin e aktiviteteve parandaluese dhe bashkëpunimin e ngushtë me institucionet arsimore, me qëllim të rritjes së sigurisë dhe vetëdijesimit të të rinjve./Gjilani INFO/
