Gjermania dhe Holanda do ta furnizojnë Ukrainën me gjashtë topa tjerë me rreze të mesme veprimi, kanë konfirmuar ministritë e Mbrojtjes të këtyre dy vendeve.
Duke folur në Samitin e NATO-s që po mbahet në Madrid të Spanjës, ministrja gjermane e Mbrojtjes, Christine Lambrecht dhe ajo e Holandës, Kajsa Ollongren, thanë se 12 howitzer tashmë janë dërguar në Ukrainë – ku këto dy vende do t’i dërgojnë edhe nga tre, transmeton Telegrafi.
“Po e tregojmë përkushtimin tonë për Ukrainën, dhe nuk duam që ta pësojnë nga agresioni rus”, tha Ollongren.
Duke komentuar paralajmërimin e NATO-s se 300 mijë trupa do të jenë në gjendje gatishmërie në vitin 2023 si përgjigje ndaj pushtimit rus në Ukrainë, Lambrecht tha se Gjermania do të ofrojë një divizion, afro 15 mijë trupa nga kjo forcë, përfshirë 65 aeroplanë dhe 20 anije.
“Gjermania është e gatshme ta kryej obligimin e saj, NATO-ja duhet të jetë e fuqishme dhe kjo duhet të tregohet edhe me numrin e trupave”, shtoi ministrja gjermane e Mbrojtjes.
