Në ambientet e SHMT “Mehmet Isai” në Gjilan është mbajtur Provimi Final për gjeneratën e parë të nxënësve të përfshirë në sistemin e Arsimit dhe Aftësimit Profesional Dual, model bashkëkohor i të nxënit që po zbatohet me sukses në Kosovë.
Nxënësit e drejtimit të Makinerisë – profili Automekanik prezantuan projektet dhe punimet e tyre praktike para komisionit vlerësues, të përbërë nga instruktorë të bizneseve partnere dhe mësimdhënës profesionalë, duke përmbyllur me sukses rrugëtimin e tyre si gjenerata e parë e Arsimit Dual në këtë shkollë.
Gjatë zhvillimit të provimit të pranishëm ishin edhe Drejtori i DKA-së në Gjilan, Jeton Rexhepi, si dhe përfaqësues të organizatës ITED, e cila ka ofruar mbështetje të vazhdueshme në implementimin e mësimit dual.
Nga shkolla u shpreh falënderim i veçantë për bizneset lokale partnere, të cilat kanë mundësuar realizimin e praktikës profesionale për nxënësit dhe kanë kontribuar drejtpërdrejt në përgatitjen e kuadrove të reja profesionale për tregun e punës.
Bashkëpunimi ndërmjet shkollës dhe sektorit privat u vlerësua si një shembull i rëndësishëm i ndërlidhjes së arsimit me praktikën profesionale dhe nevojat reale të tregut të punës/Gjilani INFO/
