Fakulteti i Shkencave Kompjuterike në Universitetin Publik “Kadri Zeka” në Gjilan ka organizuar sot një prezantim me rëndësi për studentët dhe komunitetin akademik, duke mirëpritur përfaqësuesit e kompanisë amerikane Agilyti, Andre Chapman, një firmë e njohur konsulence dhe teknologjie që vepron në fushat e Inteligjencës Artificiale, të Dhënave, Cloud-it dhe Inxhinierisë së Softuerit.
Fillimisht, Rektori i Universitetit Publik “Kadri Zeka”, Prof. Asoc. Dr. Artan Dermaku, priti në takim përfaqësuesit e kompanisë amerikane Agilyti Andre Chapman, ku theksoi rëndësinë e lidhjes së universiteteve me kompanitë inovative ndërkombëtare. Ai tha se ky prezantim tregon qartë se si universiteti dhe industria mund të bashkëpunojnë për të ofruar përvoja praktike të vlefshme për studentët dhe ata të kenë mundësi të ndjekin karrierë e tyre në nivel ndërkombëtar.
Kurse organizimi u hap nga Dekanja e Fakultetit të Shkencave Kompjuterike, Prof. Asoc. Dr. Aferdita Ibrahimi, e cila theksoi rëndësinë e bashkëpunimit ndërkombëtar dhe rolin që partneritete të tilla kanë në ofrimin e mundësive reale për studentët.
Dekanja Porf. Asoc. Dr. Afërdita Ibrahimi tha se Fakulteti i Shkencave Kompjuterike është i përkushtuar të krijojë ura bashkëpunimi me kompani të njohura ndërkombëtare. Angazhime si ky prezantim me Agilyti u mundësojnë studentëve tanë të njihen me praktikat më të avancuara të industrisë dhe të përgatiten për tregun global të punës.
Më pas, prezantimin kryesor e mbajti Andre Chapman, CEO i Agilyti, i cili paraqiti vizionin dhe aktivitetet strategjike të kompanisë, duke përfshirë edhe rolin e rëndësishëm që ekipet inxhinierike në Kosovë luajnë në zhvillimin e produkteve dhe projekteve globale të Agilyti. Ai theksoi se Kosova ka një potencial të jashtëzakonshëm në fushën e teknologjisë dhe se bashkëpunimi me UKZ përfaqëson një hap të rëndësishëm drejt thellimit të këtij partneriteti.
z. Andre tha synimi i kompanisë Agilyti është të krijojmë një urë të qëndrueshme midis industrisë dhe universiteteve, që studentët të kenë mundësi reale për të kontribuar në projekte ndërkombëtare. Ai gjithashtu prezantoi Feature Challenge 3-mujor, një program praktik vullnetar i orientuar nga industria, i cili u ofron studentëve mundësi të punojnë në detyra reale inxhinierike, të mentorohen nga profesionistë të Agilyti dhe të vlerësohen për praktika profesionale apo mundësi potenciale punësimi brenda kompanisë.
Nga ana tjetër, përfaqësuesi i CTO 55 Studio Creative Agency L.L.C, Can Mehmet nga Gjilani, vuri theksin në rëndësinë e zhvillimit të aftësive praktike dhe mendimit kritik. “Në botën e sotme të teknologjisë, studentët duhet të jenë të aftë të mendojnë si inxhinierë të vërtetë, të analizojnë probleme reale dhe të ndërtojnë zgjidhje të zbatueshme”, tha z. Mehmet. Ai inkurajoi studentët që të kenë interes për mundësinë e ofruar nga Agilyti.
Ky aktivitet u mirëprit nga studentët, të cilët patën mundësinë të bëjnë pyetje dhe të kuptojnë më thellë rolin e teknologjive bashkëkohore në tregun global të punës./Gjilani INFO/
