Në mbrëmjen e tretë të Festivalit të Dramës Origjinale Shqipe “Talia e Flakës së Janarit 2026” është dhënë shfaqja “Fluturimi mbi Teatrin e Kosovës”, prodhim i Teatrit të Ferizajt “Adriana”, me tekst të Jeton Nezirajt e regji të Agon Myftarit.
Kjo shfaqje kishte ngjallur interesimin e madh të publikut gjilanas në këtë ngjarje të madhe kulturore që po organizohet nga Komuna e Gjilanit, Drejtoria për Kulturë dhe OJQ “Varg e Vi” e ku e pranishme ishte edhe kryesuesja e Asamblesë Komunale të Gjilanit, Krenare Latifi – Kqiku.
Është kjo një shfaqje që gjatë po qëndron në skenat teatrore, ngase më herët ishte luajtur edhe nga teatro të tjera dhe kishte lënë gjurmë jo vetëm në Kosovë, por edhe jashtë vendit.
Kjo shfaqje, trajton një ndër ngjarjet më të rëndësishme të Kosovës, ditën kur pritej të shpallej pavarësia. Para shpalljes së Pavarësisë së Kosovës, teatrit i kërkohet që të realizojë një shfaqje solemne edhe pse shumëçka ishte e paqartë. Nuk dihej data se kur do të shpallet pavarësia, me çfarë flamuri e himni dhe cili do të ishte fjalimi i kryemnistrit, ndërkohë që presioni politik ishte i lartë e kur kësaj i shtohet edhe joshja materiale, trupa teatrore me çdo kusht synonte të realizojë shfaqjen edhe pse kërkesat për realizimin e saj ishin në shpërputhje me realitetin e teatrit që vepronte në kushte shumë të vështira.
Trupa teatrore synonte të zbulojë sekretin se kur do të shpallet pavarësia, sikurse edhe të vije deri te teksti i fjalimit të kryeministrit, në ditën e shpalljes së pavarësisë dhe tërë këto përpjekje kalojnë nëpër situata komike gjatë provave, që mbaheshin në vazhdimësi, por që lajmi për datën vije papritur dhe trupën teatrore e zë të papërgatitur. Edhe punëtori teknik kishte një projekt të vetin, që me një aeroplan të vjetër të mbetur nga Lufta e Dytë Botërore, ta riparojë atë, të dërgojë në vend amanetin e babait që ta ruaj për punë të mëdha dhe më të, të fluturojë nëpër vende të ndryshme të botës, ku do të lobonte për njohjen e Kosovës, por që fatkeqësisht ai kishte dështuar në këtë mision dhe kishte rënë mbi Teatrin e Kosovës.
Është kjo një shfaqje – komedi politike e satirike, shfaqje e absurdit në të cilën përmes ironisë dhe situatave komike, shfaqja krijon një dialog të drejtpërdrejtë mes artit dhe realitetit shoqëror. Nëpërmjet kësaj shfaqje është vënë në thumb të kritikës politikën e kohës, qasja e politikës ndaj artit dhe shoqëria e asaj kohe, korrupsioni, por edhe të bëmat e misioneve dhe organizatave ndërkombëtare që vepruan në Kosovën e pasluftës.
Në shfaqje si është më së miri me rolet janë mishëruar aktorët e Tetarit “Adriana” nga Ferizaj Blin Mani, Nexhat Xhokli, Dardane Mehmeti, Sherif Bega dhe Elton Tahiri. Skenogrfinë e shfaqjes e bëri Mentor U. Berisha, kostumet – Eleonora Gagica, Muzika – Lindita Isufi, mjeshtër ndriçimi – Hajrullah Elezi, mjeshtër skene – Avni Ajvazi, zërimi dje toni: Naim Berisha, grimi -Krenare Hajdari, rekuizita – Florim Hashani, teknikë skene: Florim Hashani dhe Valmir Hashani, dizajni grafik – Ngadhënjim Ismani dhe drejtor i Teatrit – Fatmir Hyseni.
Në mbrëmjen e katërt të “Talia e Flakës 2026” do të jepet shfaqja “God Bless America” nga Teatri i Gjilanit, autor dhe regjisor i së cilës është Fatos Berisha./Gjilani INFO/
