Kryetari i Komunës së Kamenicës Kadri Rahimaj së bashku me drejtorët Afrim Dervishi, Uran Berisha e Zotrim Kastrati kanë marrë pjesë në vizitën katër ditore në Kroaci.
Qëllimi i vizitës studimore ishte që të eksplorohen praktikat më të mira në mobilitetin urban të qëndrueshëm, si dhe të analizohen nismat për zhvillim ekonomik lokal, programet e arsimit dhe trajnimit profesional (VET), projektet për efiçiencën e energjisë dhe zgjedhjet inovative.
Objektivi është të mësohet nga përvoja e Koprivnicës në zbatimin e politikave të transportit të qëndrueshëm, integrimin e infrastrukturës miqësore për këmbësorë dhe çiklistë, promovimin e partneriteteve publiko-private (PPP) për zhvillimin urban, avancimin e mundësive ekonomike përmes zhvillimit të aftësive dhe ndërmarrësisë.
Ata gjithashtu përgjatë kësaj vizite kanë takuar edhe Kryetarin e Bashkisë së Koprivnicës, z. Mišel Jakšić apo Zëvendëskryetaren Ksenija Ostriž.
Në të njejtën ditë kanë vizituar edhe EnterKoprivnica që është inkubator inovativ që mbështet sipërmarrësit dhe zhvillimin ekonomik lokal përmes teknologjisë dhe ndërmarrësisë. Kryetari Rahimaj me stafin e tij kanë vizituar edhe Kompostana Koprivnica që është shembull i mirë i menaxhimit të mbetjeve organike për shfrytëzim në bujqësi dhe praktikave të reciklimit të mbeturinave. Gjithashtu nuk ka munguar as vizita tek Unioni i Shqiptarëve në Republikën e Kroacisë.
Në ditën e tretë, ata kanë vizituar shkolla të shumta në Koprivnicë si dhe PREKOM-Prelog e cila është ndërmarrje komunale që menaxhon mbetjet dhe promovon ekonomi qarkore, me teknologji të fundit në Kroaci.
Dita e fundit e vizitës ka përfshirë vizitën në institucione me rëndësi politike në Kroaci, duke mësuar më shumë rreth zhvillimit atje si dhe mbarëvajtjes institucionale.
Synimi i kësaj vizite ishte që stafi komunal të pajisen me njohuri dhe mjete për të implementuar Planin e Mobilitetit të Qëndrueshëm Urban (SUMP), duke siguruar zgjidhje transporti gjithëpërfshirëse, miqësore ndaj mjedisit dhe efikase, ndërsa forcojnë qëndrueshmërinë ekonomike dhe inovacionin.
Falenderojmë organizatën FES si dhe znj.Rudina Nallbani për bashkëpunimin si dhe organizimin e kësaj vizite./GJILANI INFO/
