Në Fakultetin Juridik të Universitetit Publik “Kadri Zeka” në Gjilan, u mbajt një takim solemn për të nderuar dhe vlerësuar kontributin e Prof. Asoc. Dr. Fejzullah Hasani, i cili, pas një karriere të shquar në Fakultetin Juridik të UKZ-së dhe në fushën e drejtësisë, ka arritur në moshën e pensionimit.
Në fjalën e tij Rektori i Universitetit Publik “Kadri Zeka”, Prof. Asoc. Dr. Artan Dërmaku, theksoi se Profesor Hasani ka qenë një figurë e pazëvendësueshme për universitetin dhe për zhvillimin e arsimit të lartë në Kosovë. Ai tha se kjo ngjarje shënon një moment të veçantë për të gjithë komunitetin akademik të këtij fakulteti, ku Profesor Fejzullah Hasani ka kontribuar në mënyrë të jashtëzakonshme gjatë gjithë karrierës së tij.
Rektori Dërmaku u shpreh se për Profesorin Hasani nuk ka qenë thjesht një detyrë mësimdhënia, por një pasion i thellë dhe një përkushtim i jashtëzakonshëm që ka mundësuar ngritjen e standardeve të arsimit në Fakultetin Juridik dhe në Universitetin Publik “Kadri Zeka” në përgjithësi. “Ai ka investuar çdo ditë me energji dhe përkushtim, duke formuar breza të tërë studentësh, të cilët sot vazhdojnë të kontribuojnë në shoqërinë tonë. Profesor Hasani është një shembull i përkushtimit dhe profesionalizmit të vërtetë,” tha Rektori Dërmaku.
Një nga momentet më prekëse të ceremonisë ishte fjalimi i Dekanës së Fakultetit Juridik, Prof. Asoc. Dr. Fatmire Krasniqi, e cila foli me mirënjohje për bashkëpunimin e gjatë dhe mbështetjen që ka pasur nga Profesor Hasani gjatë gjithë karrierës së saj profesionale. Ajo e përshkroi Profesorin Hasani si një mentor dhe një burim frymëzimi për të gjithë ata që kanë pasur mundësinë ta njohin dhe të punojnë me të. “Profesor Fejzullah Hasani ka qenë një shok pune dhe një udhëheqës i mrekullueshëm për shumë nga ne. Në këtë periudhë të shenjët të jetës së tij profesionale, ai është një shembull i vlerave më të mira të këtij universiteti. Jemi rritur profesionalisht dhe njohuritë që ai ka ndarë me ne janë të pavdekshme,” tha Dekanja Krasniqi.
Kurse Prof. Asoc. Dr. Fejzullah Hasani, pasi falënderoi të gjithë për pjesëmarrjen dhe organizimin e takimit, tha se, gjatë më shumë se një dekade pune në Fakultetin Juridik të UKZ-së, kam pasur privilegjin të punoj me kolegë të jashtëzakonshëm dhe studentë të shkëlqyer. Kam pasur mundësinë të kontribuoj në zhvillimin e dijes dhe edukimin e të rinjve dhe për këtë jam gjithmonë mirënjohës. Ai shtoi se kjo është një fazë e re e jetës, porse do të mbaj gjithmonë me vete kujtimet e shkëlqyera dhe lidhjet e forta që ka krijuar në Universitetin Publik “Kadri Zeka”.
Në këtë ceremoni, kolegët e Profesor Hasanit e përshkruan atë si një person që ka punuar duke lënë ndikim të pashlyer në jetën profesionale të shumë brezave të studentëve dhe kolegëve. Ata thanë se pensionimi mund të jetë një kufizim ligjor, por ai nuk është një fund i mundësive për një individ të tillë si Profesor Fejzullah Hasani. “Pensionimi është thjesht një ndalesë në një udhëtim të gjatë, por nuk është një ndalim i asaj që mund të ofrojë profesori. Ai ka dhënë kaq shumë për këtë universitet dhe ka ndihmuar të formohen shumë breza studentësh dhe profesionistësh” kanë thënë pos tjerash kolegët e profesorit Hasani.
Në fund, Dekanja e Fakultetit Juridik Prof. Asoc. Dr. Fatmire Krasniqi, i ka dhënë mirënjohje Prof. Asoc. Dr. Fejzullah Hasani, me rastin e pensionimit dhe kontributit të dhënë në zhvillimin e Fakultetit Juridik./GJILANI INFO/
