Fillimisht këshilltarët komunalë kanë parashtruar pyetje dhe kërkesa për zëvendëskryetari e Komunës, Hasan Aliu, dhe drejtorët e Drejtorive Komunale, për çështje të ndryshme në interes të qytetarëve. Për temat e ngritura, përfshirë investimet kapitale, menaxhimin e mbeturinave, infrastrukturën, si dhe trajtimin e kërkesave të qytetarëve, ka dhënë sqarime zëvënëskryetari Aliu.
Ndërkaq, kryesuesi i Kuvendit Komunal, Bekim Azizi ka informuar këshilltarët dhe ata që ishin të pranishçm për vlerësimin e ligjshmërisë së disa akteve të miratuara në mbledhjet e mëparshme të Kuvendit, të cilat kanë kaluar me sukses kontrollin ligjor në përputhje me rregulloret në fuqi.
Janë shqyrtuan dhe u miratuan këto pika të rendit të ditës: Miratimi i procesverbalit nga mbledhja e katërt e rregullt e Kuvendit Komunal të Vitisë;
Propozim-vendimi për bartjen e mjeteve nga të hyrat vetanake të vitit 2024 në vitin 2025, në përputhje me planifikimet buxhetore dhe nevojat e identifikuara të komunës; Propozim-vendimi për lirimin nga pagesa të punonjësve të Policisë së Kosovës për shërbimet që ofrohen në Qendrën Kryesore të Mjekësisë Familjare dhe në institucionet e tjera shëndetësore publike të menaxhuara nga Komuna e Vitisë.
Pastaj janë prezantuar dy informata me karakter përgatitor dhe informues: Informatë rreth Manifestimit Tradicional Kulturo-Sportiv “Flakadani i Karadakut 2025”, ku ndër të tjera u prezantua edhe raporti financiar i vitit 2024 për këtë aktivitet, nga drejtori i Drejtorisë për Kulturë, Rini e Sport, Valmir Sahiti.
Në raport u theksua se këtë vit është shënuar një ulje e ndjeshme e shpenzimeve, krahasuar me edicionet e kaluara të manifestimit, duke reflektuar një menaxhim më të kujdesshëm të buxhetit dhe racionalizim të mjeteve financiare.
U theksua gjithashtu rëndësia e angazhimit të të gjitha strukturave komunale për një organizim sa më të suksesshëm dhe dinjitoz të këtij manifestimi me rëndësi kulturore dhe historike për komunën.
Gjithashtu u prezantua edhe një informatë për menaxhimin e mbeturinave në Komunën e Vitisë nga drejtori i Drejtorisë për Shërbime Publike dhe Emergjencë Basri Aliu, i cili paraqiti të dhëna për situatën aktuale, sfidat që hasen në terren, si dhe hapat që po ndërmerren për përmirësimin e këtij shërbimi thelbësor për qytetarët.
Mbledhja u karakterizua me diskutime konstruktive nga ana e këshilltarëve dhe me një përkushtim të përbashkët për adresimin e çështjeve të rëndësishme për zhvillimin e qëndrueshëm të komunës dhe mirëqenien e qytetarëve të Vitisë./GJILANI INFO/
