Aktivitetet e Manifestimit Mbarëkombëtar “Flaka e Janarit 2023”, kanë vazhduar edhe këtë të diele, me ecjen për “Flakën e Janarit” në nderim të të rënëve për liri, gjegjësisht në nderim të heronjve Rexhep Mala, Nuhi Berisha e Kadri Zeka.
Edhe nga Gjilani, por edhe nga Kamenica, pjesëmarrësit janë bërë bashkë për të nisur ecjen në nderim të këtij manifestimi, ecje kjo fillimisht deri te Kulla e Nuhi Berishës në Sfircë, për të vazhduar më pas deri te kulla (e papërfunduar) e Rexhep Malës në Hogosht, si dhe deri te kulla e Kadri Zekës në Poliçkë. Që edhe e ka përmbyllur shtegun e ecjes, për t’u rikthyer pjesëmarrësit në Kamenicë gjegjësisht në Gjilan.
Përndryshe, aktivitetet e “Flakës së Janarit 2023”, do të vazhdojnë me 17 janar në Gjilan ku në program janë “Akademia e Flakës”, dokumentari kushtuar heroit Xhevat Qerimi si dhe Ekspozita “Peneli i Flakës 2023″, me dy ekspozita. /GJILANI INFO/
